Ədalət Partiyasının mərhum sədri İlyas İsmayılov vəfatından xeyli vaxt keçir. İlyas İsmayılovun irsinin qorunması üçün hansı işlərin görüldüyü, eləcə də partiyaya kimin sədr olacağı ictimaiyyəti yaxından maraqlandırır.
Modern.az saytının əməkdaşı bu və digər məsələlərlə bağlı Ədalət Partiyasının sədr müavini Mütəllim Rəhimliyə müraciət edib.
O bildirib ki, İlyas İsmayılov daşıdığı ideyaları cəmiyyətə catdırmaq və əsaslandırmaq üçün özündən sonra sanballı əsərlər qoyub:
"İlyas İsmayılov Azərbaycanın çox görkəmli dövlət, ictimai və siyasi xadimlərindən biri idi. Çox təəsüf ki, onun bilik və bacarıqlarından dövlətimizin inkişafı üçün kifayət qədər istifadə olunmadı. Sovetlər dönəmində SSRİ rəhbərliyində təmsil olunan iki azərbaycanlıdan biri olmuşdu. SSRİ məkanında böyük nüfuz sahibi idi. Onun keşməkeşli həyat yolu və qazandığı təcrübə özündə bənzərsiz keyfiyyətlər formalaşdırmışdı. Siyasi proseslərə elmi, təcrübi və proqnostik yanaşmaları səhvsiz nəticələrə gətirib çıxarırdı. Sovet dönəmində yetişən kadr olmasına baxmayaraq, Azərbaycanın müstəqilliyi, suverenliyi uğrunda mübarizədə heç vaxt güzəştli mövqe tutmadı. Əksinə, milli azadlıq hərəkatının üzvlərini qorudu, onlara qarşı qanunsuz davranışların qarşısını aldı. Hadisələrə obyektiv münasibəti, dövlətçilik mövqeyindən yanaşması hər iki tərəfdə - həm müxalifətdə, həm də hakimiyyətdə hörmətlə qarşılanırdı. Ən yüksək vəzifələrdə işlədiyi vaxtda da, siyasi partiya sədri olduğu dövrdə də qanunun aliliyini, milli-mənəvi, əxlaqi dəyərlərimizi hər şeydən üstün tuturdu. Ədalət hissləri onun həyatının başlıca meyarı idi. Elə buna görə də yaratdığı partiyanın adını Ədalət qoymuşdu.
İlyas müəllimin özündən sonra hüquq -mühafizə sistemində və partiyada çoxsaylı ardıcılları görünür. Azərbaycanın prokurorluq orqanlarında əsl prokuror simasını İlyas müəllim müəyyənləşdirmişdi. Siyasi müstəvidəki münasibətlərdə tolerantlıq, əxlaqi keyfiyyətlərin gözlənilməsi nümunəsini uğurla tətbiq etdi. Dövlətçilik təcrübəsi, elmi, fəlsəfi, hüquqi potensialı, idarəetmə qabiliyyəti, lider keyfiyyətlərinə baxmayaraq, Ədalət Partiyasının ideoloji əsasda formalaşmasını təmin etdi. Daşıdığı ideyaları cəmiyyətə catdırmaq və əsaslandırmaq üçün özündən sonra sanballı əsərlər qoyub getdi. Təbii ki, Ədalət Partiyası fəaliyyət göstərdiyi müddətdə bu ideyaları hər zaman başlıca prinsipi olaraq gözləyib. İlyas müəllimin dünyasını dəyişməsi həm bizim, həm də ölkəmiz üçün çox böyük itkidir. Biz onun yolunun davam etdirilməsi üçün nə lazımdırsa, edəcəyik".
M.Rəhimli vurğulayıb ki, Ədalət Partiyasına sədr olmağa layiq çox adam var:
"Ədalət Partiyası Nizamnaməsinə uyğun olaraq fəaliyyətini davam etdirir. Nizamnaməyə görə sədr olmadıqda onun səlahiyyətlərini müvəqqəti olaraq Ali Məclisin sədri yerinə yetirir. Hazırda Meydan Babayev bu vəzifədədir. Siyasi partiyalar haqqında qanunun tələblərinə görə, mart ayında Ədalət Partiyası növbəti qurultayını keçirməlidir. Ancaq İlyas müəllimin xəstələnməsi və dünyasını dəyişməsi bu prosesi yubatdı. İndi həm qanuna, həm də sədrin yoxluğuna görə qurultay keçirmək məcburiyyətindəyik. Düşünürəm ki, Ədalət Partiyasında sədr olmağa və partiyanın inkişafına töhfə verəcək şəxslər çoxdur. İlyas müəllimin böyüklüyündən biri də özündən sonra lider olmağa layiq üzvlər yetişdirməsidir. Lakin indi bu məsələlər müzakirə predmeti deyil. Ədalət Partiyası hüzn içərisindədir".
