“Ukrayna ilə ABŞ arasında gərginlik keçmiş prezident Co Bayden administrasiyası dövründən miras qalıb. Ağ Evin hazırkı rəhbəri Donald Tramp və komandası isə həmin mirasın üstünə yanacaq tökərək onu alovlandırır”.
Bunu analitik Aqşin Kərimov ötən gün Ağ Evdə ABŞ və Ukrayna prezidentləri arasında baş tutan gərgin görüşə münasibətdə deyib.
Analitikin sözlərinə görə, Donald Tramp Ukrayna Prezidenti Volodimir Zelenskidən özünə yox, bütövlükdə dövlət olaraq ABŞ-a təşəkkür etməsini istəyir:
“Ukraynanın müharibə apara bilmək qabiliyyətini, daha dəqiq desək, əməliyyat planlaşdırması, kəşfiyyat dəstəyini ABŞ formalaşdırıb. Rəqəmlərə də baxın, görün ABŞ Ukraynaya nə yardımlar edir, hansı ABŞ silahları Kiyev üçün dönüş nöqtəsi yaradıb. Yəni prinsipcə baş qaxıncı və diplomatik nəzakətsizlik olsa da, Tramp yalan danışmır.
Ortada 500 milyard dolların aqibəti daha çox maraqlı sual kimi səslənir. Məncə, ən böyük problem buradan qaynaqlanır, hərçənd, açıq rəsmi rəqəmlərdə bu məbləğ göstərilmir.
Onda ya Tramp məbləğlə bağlı manipulyasiya edir, ya həqiqəti deyir. Həqiqəti deyirsə, o zaman sual olunur, 500 milyard dollar hara xərclənib və onun açıqlanmayan təyinatı nədir?
Nəticə olaraq Trampın “500 milyard dollarlıq” məqsədi Ukraynanın zəngin sərvətləri üzərində geoiqtisadi mülkiyyət əldə etmək və onu leqallaşdırmaq yönündə qurulub.
Zelenskinin ittihamları isə əslində yeni deyil, sadəcə bu dəfə məsələ publik olaraq ikitərəfli qaydada mübahisə şəklində partladı. ABŞ-də isə Donald Tramp yox, hətta Bayden də hakimiyyətdə olsaydı, onun komandası Zelenskinin publik ittihamlarına qarşı bıçaqlarını itiləyəcəkdi. Amma Trampdan fərqli olaraq daha diplomatik və siyasi leksikonla bunu edəcəkdi”.
globalinfo.az
