Bakının Pirallahı rayonu, Gürgən qəsəbəsi 231 nömrəli tam orta məktəbin direktoru Lamiyə İlhamsoyun səsyazısı yayılıb. Səsyazısında direktorun müəllimlərlə mübahisəsi yer alıb.
Məlumata görə, direktor müəllimlərin ad günü ilə bağlı ona aldıqları hədiyyəni bəyənməyib və bu səbəbdən pedoqoji heyəti təhqir edib. O, müəllimlərə “Mənə dilənçi payı lazım deyil” deyə irad bildirib.
Bakı Şəhəri üzrə Təhsil İdarəsi direktorun səsyazısı ilə bağlı rəsmi məlumat yayıb.
Bildirilib ki, Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin və Bakı Şəhəri üzrə Təhsil İdarəsinin nümayəndələri məktəbdə olub.
Rəsmi şəxslər pedaqoji heyətin üzvləri ilə müvafiq söhbətlər aparıblar.
Məsələ ilə bağlı araşdırma aparılır. Bakı Şəhəri üzrə Təhsil İdarəsindən bildirilib ki, araşdırmanın nəticəsi barədə ictimaiyyətə əlavə məlumat veriləcək.
1xeber.media xəbər verir ki Modern.az-ın məlumatına görə, səsyazısı yayılan direktor Lamiyə İlhamsoy ləğv olunmuş Azərbaycan Beynəlxalq Universitetinin məzunudur.
Belə ki, o, 2005-ci ildə Azərbaycan Beynəlxalq Universitetininin (ABU) Filologiya (ingilis dili) fakultəsini bitirib.
2005-ci ildən 2022-ci il tarixinədək Nizami rayonu 277 nömrəli tam orta məktəbdə ingilis dili müəllimi vəzifəsində çalışıb.
2009-cu il tarixindən Yeni Azərbaycan Partiyasının üzvüdür.
2022-ci il tarixindən Bakı şəhəri Pirallahı rayonu N.S.Teymurov adına 231 nömrəli tam orta məktəbə direktor vəzifəsinə təyin olunub.
Qeyd edək ki, Azərbaycan Beynəlxalq Universiteti 1997–2010-cu illərdə fəaliyyət göstərib. ABU-nun fəaliyyəti 2010-cu ildə təhsil nazirnin əmri ilə dayandırılıb və lisenziyası ləğv edilib.
