Bu günlərdə Azərbaycan Respublikasının Baş Prokurorluğu qanunvericiliyə uyğun olaraq ölkə ərazisindən kənarda gizlənən İlqar Hacıyevi, Məhəmməd Mirzəlini, Qurban Məmmədovu, Elşad Məmmədovu, Qabil Məmmədovu, Tural Sadıqlını İstintaq İdarəsinə çağırıb.
Baş Prokurorluqdan verilən rəsmi məlumata görə, Baş Prokurorluğunun İstintaq İdarəsi tərəfindən təqsirləndirilən bu şəxslərə Azərbaycan Respublikası Cinayət-Prosessual Məcəlləsinin 467-13.4-cü maddəsinin tələbinə əsasən rəsmi bildirişlər göndərilib. Onlar bir sıra cinayətlərdə ittiham olunurlar.
Modern.az-a Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə bildirib ki, faktiki olaraq xaricdə yaşayan, sosial media üzərindən Azərbaycan əleyhinə təbliğat aparan, Azərbaycan qanunlarının pozulması ilə müşahidə olunan verilişlər və çıxışlar hazırlayaraq ölkənin daxilində ictimai-siyasi sabitliyin pozulmasına, hakimiyyətin zorla ələ keçirilməsinə və digər qanunsuz aksiyaların təşkil edilməsinə çağırışlar edən bir neçə şəxs barəsində Azərbaycan Respublikasının Baş Prokurorluğu tərəfindən istintaq orqanına gəlmələri üçün çağırış göndərilib:
“Belə olan halda bu şəxslərlə bağlı sual yaranır ki, onlar Azərbaycana istintaq orqanına gələcəklərmi? Gəlməyəcəkləri halda nə baş verəcək? Onların bir çoxları barəsində əvvəllər də Azərbaycan Respublikasının Baş Prokurorluğu və Dövlət Təhlükəsizlik Xidməti tərəfindən cinayət işi başlanmış və barələrində həbsli axtarışlar verilmişdir. Lakin bunun icra edilməsi mümkün olmadıqda yeni hallar üzrə digər istintaq aparılan qurumlarda ikili istintaq gedirsə, bir icraatda birləşdirilməsi üçün Azərbaycan Respublikasının Baş Prokurorluğuna göndərilmişdir. Azərbaycan Respublikasının Cinayət Prosessual Məcəlləsinə uyğun olaraq şəxslərin istintaqa gəlməsi üçün ilkin addımlar atılmış və məlumatlar verilmişdir”.
Onlar istintaqdan yayınmaqda davam etsələr nə baş verəcək?
Müsahibimizin sözlərinə görə, Azərbaycan qanunvericiliyi imkan verir ki, onların özü olmadan da barələrində qiyabi icraat işləri başlanılsın:
“Prokurorluğun təqdimatı ilə onlar barəsində məhkəmə tərəfindən həbsli və digər qərarların verilməsi mümkündür. Görünən budur ki, aprel ayında istintaqa dəvət olunan şəxslər müvafiq orqana gəlməsə, onlar barəsində əvvəlki işlərlə birləşdirilərək qiyabi icraat başlanılacaq. Məhkəməyə müraciət edilməklə, qiyabi məhkəmələrin keçirilməsi təmin ediləcək. Belə olan halda onların iştirakı olmadan barələrində məhkəmə qərarları çıxarılacaq. Səhv etmirəmsə, Rəhim Qazıyevlə bağlı belə bir məhkəmə qərarı var idi, o Moskvada tutularaq Azərbaycana gətirildi. Məhkəmənin qərarı olduqdan sonra, axtarışlar davam etdirildiyi halda onlar ölkəyə gəlmədikləri halda belə beynəlxalq axtarışa düşürlər. Onlar digər ölkələr tərəfindən saxlanıldıqda Azərbaycan Respublikası ilə müəyyən danışıqlar aparılır, onların günahını sübut edən ittiham aktları istintaq orqanları tərəfindən həmin ölkəyə təqdim edilir. Daha sonra həmin şəxslər razılaşma ilə Azəbaycan ekstradisiya edilə bilər. Mən elə hesab edirəm ki, bu istintaq orqanlarının atdığı ilkin addımdır. Növbəti dövrlərdə qanunlar çərçivəsində yeni addımların da atılacağının şahidi olacağıq”.
