Suriya lideri Əhməd əş-Şara Rusiya Prezidenti Vladimir Putindən hazırda Rusiyada olan keçmiş prezident Bəşər Əsədin mühakimə olunmaq üçün Dəməşqə təhvil verilməsini tələb edib.
Qeyd edək ki, 2024-cü il 8 dekabrında devrilən Bəşər Əsəd Rusiyaya sığınıb.
Vladimir Putin hansı şərtlər daxilində buna gedə bilər?
Politoloq Əlimusa İbrahimov deyib ki, Rusiya Bəşər Əsədi qəbul edib sığınacaq verərkən gec-tez Suriyanın onu tələb edəcəyini də yaxşı bilirdi:
“Bu riskin olmasına baxmayaraq Kreml tərəddüd etmədən Bəşər Əsədin sığınacaq tələbini qəbul etdi. Çünki o, həm Vladimir Putinin dostudur, həm də prezident kimi Rusiya ilə həmişə yaxşı münasibətləri olub. Yəni o, Bəşər Əsədi nə vaxtsa geri vermək, ya da hansısa divident əldə etmək üçün ölkəsində saxlamır. Bunu Suriyanın yeni prezidenti də əslində yaxşı bilir. Bununla belə Bəşər Əsədi Rusiyadan istəyirlər.
Hesab edirəm Suriya prezidenti Rusiya ilə münasibətləri yaxşılaşdırmaq istəyir. Ümumiyyətlə, bu təklifin məhz indi gəlməsi təsadüfi deyil. Rusiyanın iki hərbi bazası Suriyadadır. Bundan başqa Latakiya ərazisində baş verən son hadisələrin də bir ucu Rusiyaya toxunur. Söhbət Ələvi qiyamından gedir.
Suriya Rusiyanın ölkənin daxili işlərinə qarışmamasını istəyir. Bəşər Əsəd bu mənada tələbi qüvvətləndirmək məqsədi ilə irəli sürülə bilər. Hesab edirəm yaxın günlərdə Suriya və Rusiya arasında danışıqlar başlayacaq. Tərəflər arasında danışıqların nəticəsi nə olur, olsun Putin Əsədi geri verməyəcək”.
Globalinfo.az
