Ötən ilin yekunlarına görə, Azərbaycan ümumi daxili məhsulun (ÜDM) nominal həcminə görə MDB ölkələri arasında beşinci yeri tutub.
1xeber.media MDB-nin Dövlətlərarası Statistika Komitəsinin hesabatına istinadən xəbər verir ki, 2024-cü ildə Azərbaycanın nominal ÜDM-i 74,315 milyard ABŞ dolları təşkil edib ki, bu da əvvəlki illə müqayisədə 4,1 % artım deməkdir.
Azərbaycan MDB ölkələri arasında nominal ÜDM həcminə görə Ermənistan, Qırğızıstan, Tacikistan və Moldovanı qabaqlayır.
Ötən il MDB-də nominal ÜDM göstəricisinə görə ilk beşliyə Rusiya - 2,16 milyard ABŞ dolları (+4,1 %), Qazaxıstan - 288,112 milyard ABŞ dolları (+4,8 %), Özbəkistan - 114,9 milyard ABŞ dolları (+6,5 %) və Belarus - 79,09 milyard ABŞ dolları (+4 %) daxil olub.
Azərbaycanı xeyli fərqlə Ermənistan 25,8 milyard ABŞ dolları nominal ÜDM həcmi ilə (+5,9 %), Qırğızıstan - 17,2 milyard ABŞ dolları (+9 %), Tacikistan - 13,7 milyard ABŞ dolları (+8,4 %) və Moldova - 12,9 milyard ABŞ dolları (+0,6 %) izləyir.
