“Şərurlu İsfəndiyar” kimi tanınan tikinti maqnatı İsfəndiyar Axundovun açıqlamaları müxtəlif yönlərdən müzakirə edilir. O, müsahibə zamanı “əlimdə səlahiyyət olsa, bütün məscidləri söküb, yerində məktəb tikərəm” sözlərini səsləndirib.
Bu fikirlər yalnız mənəvi baxımdan yolverilməz sayıla bilməz. Bu, hüquqi baxımdan da araşdırma predmeti sayılmalıdır. Fikrimcə, bu sözlər maqnatın barəsində hüquqi araşdırma aparmağa kifayət qədər imkan verir.
Çoxları onun sözlərini ciddiyə almır, lağlağı edir. Amma nahaq! Kifayət qədər ciddi və təhlükəli fikirlər, təhrikedici çağırışlardır.
Azərbaycan əhalisinin 90 faizdən çoxu müsəlmandır. Demək, o, milyonlarla insanı təhqir edib, onların dini inancına hörmətsizlik göstərib.
44 günlük Vətən müharibəsindən sonra dövlət işğaldan azad edilən Qarabağ və Şərqi Zəngəzurda erməni vandallarının dağıtdığı məscidləri, başqa ibadət yerlərini təmir və bərpa etdirir. Prezident İlham Əliyev və birinci xanım Mehriban Əliyeva açılışlar edirlər. Şuşada, Xankəndidə, Ağdamda, Ağdərədə, Xocalıda, Zəngilanda və başqa işğaldan azad edilən yerlərdə tarixi abidələr, məscidlər yenidən həyata qaytarılıb. Prezident və xanımı məscidlərə Quran kitabları bağışlayırlar.
Burada bir haşiyəyə çıxmaq yerinə düşərdi. Mərhum Prezident Heydər Əliyev ABŞ Dövlət Departamentinin xüsusi nümayəndəsi, keçmiş Minsk Qrupunun həmsədri Keri Kavanonun Ağdam məscidindən ona təqdim etdiyi daş parçasını gördükdə necə kövrəlmişdi.
O cür möhkəm iradəli bir lider, dövlət başçısı göz yaşlarını saxlaya bilməmişdi. Ağdam azad edildikdən sonra vaxtilə Ümummilli liderə verilən həmin daş parçası Ağdam Cümə məscidində saxlanır. Mən ötən ilin sentyabrında həmin məscidi ziyarət edərkən o daş parçasının nə qədər böyük bir mahiyyət daşıdığını anladım… O kiçicik daş parçası düşmənin başına qaya kimi düşdü.
Bəhs etdiyimiz bu qədər həssas bir mövzudur. Sən necə məsuliyyətsiz biri olasan ki, “məscidləri sökərəm” deyəsən. İnanclı insanları təhqir edəsən. İslam dini haqda ağzına gələni danışasan. Dövlətin, Prezidentin bu istiqamətdə dünyaya nümunə sayılacaq fəaliyyətini gözdən salmağa çalışasan. Millətin qutsalına dil uzadasan.
“Şərurlu” “məscidlərin yerində məktəb tikərəm” deməklə manipulyasiya edir. Dinlə dövləti, inancla elmi qarşı-qarşıya qoymağa çalışır – bilərəkdən, ya da bilməyərəkdən. Onun bu məsuliyyətsiz, islamafob fikirləri Azərbaycana beynəlxalq aləmdə ciddi problem yarada bilər. Müsəlman dünyasında ölkəmizi qınaq obyektinə çevirər.
Bir yandan da ermənilər deyə bilərlər ki, İsfəndiyar Axundov da onların tayıdır – islama qarşı savaş açıb. Üstəlik Bakıda yaşayır, kifayət qədər varlı, məşhur, səlahiyyətli şəxsdir. Ermənilər məscidlərdə heyvan saxlayıb müsəlmanları və İslam dinini təhqir ediblər, İsfəndiyar Axundov isə məscidləri dağıtmaq fikrində, niyyətində olduğunu açıq şəkildə səsləndirib. Erməni separatçıları 2023-cü ildə Azərbaycan Ordusunun antiterror əməliyyatları nəticəsində zərərsizləşdirildi. Qarabağdan qovuldular, başçılarının hazırda Bakıda məhkəməsi gedir. Görəsən, yanlarında İ.Axundova yer tapılarmı? Bu ritorik sualın daha ciddi cavab var əslində…
Azərbaycan dövləti Bakının mərkəzində erməni kilsəsini təmir etdirir, onu qoruyur. Ruslara, yəhudilərə, ölkəmizdə yaşayan başqa xalqlara aid bütün müqəddəs abidələri, ibadət yerlərini də həmçinin dağılmağa, dağıdılmağa imkan vermir. Azərbaycan çoxkonfensiyalı, multukultural, dini müxtəlifliyi özündə daşıyan, buna dözümlü yanaşan ölkə olduğunu çoxdan hər kəsə göstərib, tarixə həkk edib. Bunu kimlərəsə xoş gəlmək üçün etməyib. Azərbaycan xalqının təbiəti belədir. Dövlətimiz fərqli dinlərin təmsilçilərinə etiqad azadlığı verir, onlara ibadət sərbəstliyi tanıyır, İsfəndiyar Axundov isə deyir ki, “məscidləri sökərəm, dağıdaram”. Demək bu, yalnız islamafobya deyil, bütün dinlərə, inanclara qarşı dözümsüzlük nümunəsidir! Antibəşəridir! Səni din və dindar adına hansısa şarlatan aldadıb deyə, belə danışmalısan?! Bəlkə, “Şərurlu İsfəndiyar” başqa təriqətin üzvüdür, özünü savadsız, cahil kimi göstərməklə kamuflyaj olur? İctimai rəyə bu cür ziyanlı “toxum” səpir? Onun bu fikri ölkədə ciddi qarşıdurma yarada bilər. Fürsət gözləyən qüvvələr bunu provokasiya edər. Məsələ bu qədər ciddidir yəni.
Onun sözləri barbarlığa çağırışıdırmı? Deyərdim, bəli! Adam açıqca inanclı insanların heysiyyatı ilə oynayır, onları aşağılayır. Ölkədə qarşıdurma yaratmağa çalışır. Baş Prokurorluq, Dövlət Təhlükəsizlik Xidməti bu məsələyə qarışmalı, maqnatın ifadəsini almalı, ona sərt şəkildə xəbərdarlıq etməlidir. Necə ki, bəzi jurnalistlər həssas mövzularda ehtiyatsız məqalələr yazanda, dövlətin təhlükəsizliyini təhdid edən, dövlət sirri sayılan məlumatları tirajlayanda haqlı şəkildə hüquq mühafizə orqanlarına dəvət olunurlar, xəbərdarlıq edilirlər, bu məsələdə də eyni şəkildə davranılmalıdır.
İsfəndiyar Axundov daha bir cinayətə yol verdiyini efirdən səsləndirib. Üstəlik, özünü, ailəsini ifşa edib. Deyib ki, övladlarına saxta yolla, rüşvətlə diplom alıb. Bu, çox ciddi qanun pozuntusu, cinayət əməli sayılır. Belə çıxır, övladlarının ali təhsilini təsdiq edən sənəd (diplom) saxtadır. Bu diplomla işə düzəliblərsə, təcili araşdırılıb, işdən uzaqlaşdırılmalıdırlar. Bunu qanun tələb edir.
Ortaya maraqlı sual çıxır: İsfəndiyar Axundov bu diplomları neçənci ildə satın alıb? Həmin dövrdə təhsil naziri kim olub? “Şərurlu”nun yaşını nəzərə alsaq, demək olar ki, övladları “universiteti” 15-20 il öncə “bitirib”. Bu da Misir Mərdanovun nazir olduğu vaxta təsadüf edə bilər.
Saytımız bu sualla Misir Mərdanova müraciət edib. Onun cavabını başqa yazıda təqdim etmişik.
Məsələyə Elm və Təhsil Nazirliyi də qarışmalıdır. Nazirlik gecikmədən tikinti maqnatının iddialarına rəsmi cavab verməlidir. Həqiqətən belə hal olubsa, ortaya çıxarılmalı, diplom alveri edən şəxslər məsuliyyətə cəlb edilməlidir – Axundovlar ailəsinin bu işdə əli olan üzvləri ilə birlikdə…
Azər Ayxan
