20 Yanvar şəhidinin qızı, əməkdar artist Məsmə Aslanqızının Azərbaycan Akademik Milli Dram Teatrının bədii rəhbəri Mehriban Ələkbərzadə ilə bağlı iddialarına ikinci cavab verib.
Mehriban Ələkbərzadə sosial şəbəkə hesabından qalmaqalın səbəbini və dolayısı ilə şərləndiyini ifadə edib.
Doğrusu, Mehriban xanım haqda “şəhidlərə biganə”, “qeyri-vətənpərvər” iddiası inandırıcı deyil və onun yaradıcılığına az-çox bələd olanlar bu ittihamların həqiqəti əks etdirdiyinə əvvəldən şübhə edirdilər. Məsələ isə bu deyil!
Məsələ Mehriban Ələkbərzadənin sosial şəbəkə hesabından verdiyi cavabın dil-üslub xüsusiyyətləri, qrammatikası, ifadə tərzidir!
Əvvəlcə Mehriban Ələkbərzadənin cavab statusunu olduğu kimi təqdim edək:
“Əziz dostlar,həmkarlar! Əslində “sözünü o kəslərə de ki,onlar səni anlasınlar” deyə yola çıxıram. Demək ondan başlayaq ki, sosial şəbəkələrdə və saytlarda mənim ünvanıma arzuolunmaz YAZIlar başlayıb. Məsələyə aydınlıq gətirmək məcburiyyətindəyəm, yoxsa onların bu həqiqətə uyğun olmayan sözlərinə inananlar da ola bilər.
Demək...mütamadi olaraq teatrda sözü olan, istəyi yaxud xüsusi xahişi olan aktyorlar rəhbərliyə müraciət edirlər. Arzusunu bildirir,bu normaldır. Belə bir vəziyyət Məsmə Aslanqızı ilə də oldu. Qəbuluma gələrək bildirdi ki, çox çətin vəziyyətdədir. Evi müsadire ile elinden çıxıb. ( bu mövzu şehid ailesine yaraşmayan emelin neticesidir- deye açıqlamıram) İndi sizden EV isteyirem! Teatr məni Evlə təmin etməlidir. Mən anlatdım ki,mənim ev verə bilmək səlahiyyətim yoxdur. O zaman o 20 yanvar şəhidinin qızı kimi mənə Ev verdirin. Teatr bu məsələni-siz bu məsələni həll etməlisiniz!” deye tekid etdi.Bütün deyilənlərə bir daha münasibət bildirərək...yenə də bəyan etdim və edirəm ki, hətta 20 yanvar Şəhidinin qızı olsa belə, mən Teatrın Bədii rəhbəri kimi EV məsələsini həll edə bilmirəm. EV məsələsini başqa qurumlar həll edir. Biz də məhz şəhid qızı olduğu üçün onu Prezident mükafatı siyahısına salmışıq. Bir dəstək kimi. Amma bu ona yetərli deyil deyə... bax belə həqiqətə uyğun olmayan və təhqirdən çəkinməyən ifadələr işlədir.
O ki qaldi, mənim vətəndaşlıq mövqeyimə... Az-çox mənim yaradıcılığımla tanış olan, məni tanıyan hər kəs bilir ki...mən milli-mənəvi dəyərlərimiz naminə maarifçilik işlərinin, Böyük zəfərimiz naminə “Qələbəyə qədər davamı var”- silsilə hərbi vətənpərvərlik mövzusunda müəllif proqramlarının yaradıcısıyam. Mənim yetərincə məhz Vətənpərvərlik ruhuna xidmət edən fəaliyyətim var ki, onlar bizim ərazi bütövlüyümüz uğrunda savaşlardan, Vətən yolunda Şəhid olan insanlardan bəhs edirdi.
Ən azı...mənim sözlərimin izahı üçün arxivlər var! Mənim Azərbaycan xalqının qəhrəmanlıq tarixi, Azərbaycan xalqının qəhrəmanlıq mübarizəsinə həsr edilmiş, bu yolda canını və qanını fəda etmiş insanların xatirəsinə ithaf edilmiş 50 dən çox müəllif filmlərim və araşdırmalarım var. HEÇ KİM MƏNİM VƏTƏNDAŞLIQ MÖVQEYİMƏ ləkə gətirə bilməz. Çünki buna əsas və fakt yoxdur”.
Mehriban xanımın bu yazdıqlarına və onların həqiqəti ifadə etməsinə heç bir şübhə etmədən, keçək mabədə:
Mehriban Ələkbərzadə - Azərbaycan televiziya, teatr və kino rejissoru, ssenari müəllifi, film direktoru, televiziya aparıcısıdır, Naxçıvan Muxtar Respublikasının əməkdar incəsənət xadimi (2003), Azərbaycan Respublikasının əməkdar incəsənət xadimi (2013), Azərbaycan Respublikasının Dövlət Mükafatı laureatı (2024). Yuğ Teatrının baş rejissoru (2017–2022), Gənc Tamaşaçılar Teatrının baş rejissoru (2022–2023), Akademik Milli Dram Teatrının bədii rəhbəri (2023-cü ildən)...
Kifayət qədər parlaq karyerası var və doğrusu, Mehriban Ələkbərzadə istedadlı, qabiliyyətli insandır, özünü realizə etməyi bacarıb, ziyalıdır...
Amma ziyalı hər şeydən öncə dilinə-üslubuna diqqət etməlidir – fərqi yoxdur, o, məqalə yazır, yoxsa status, şərh...
Ziyalı istənilən yazısına diqqətli olmalıdır, dili, dilin qaydalarını qorumalıdır, hər yazısında qarşında bir aydın, parlaq bir sima olduğunu hiss etməlisən. “Statusdur, nə olacaq ki” kimi eybəcər yanaşma tərzinin doğurduğu pintiliyin dil qaydalarına necə zərbə vurduğunu da Mehriban Ələkbərzadə hamıdan daha gözəl bilməlidir.
Mehriban xanım, “sözünü o kəslərə de ki, onlar səni anlasınlar” sitatı mövcud deyil; Əgər söhbət Mirzə Cəlilin məşhur ifadəsindən gedirsə, o, “Sözünü o kəslərə de ki, sənə qulaq vermirlər” deyib! Yox, bu, sizin təklif etdiyiniz yanaşmadırsa... Bax, sitatı və cümləni doğru qurmaq lazımdır ki, “ya, ya da” olmasın, konkret nəyi hədəflədiyinizi izah etmək üçün statusunuzu oxuyan hər kəsə zəng edib, nəyisə izah etməyə ehtiyac qalmasın!
Statusda “ə” əvəzinə bir neçə cümlədə “e” hərfindən istifadə edilir. Dilə tam bir həqarətdir - əvvəla ona görə ki, “ə” hərfi Mehriban xanımın bu statusu yazdığı avadanlıqda – kompüter, planşet, telefon – var, çünki işlənib o hərf. Hətta “ə” hərfini “e” ilə yazıb, bunu istifadə etdiyi avadanlıqda “ə” hərfinin olmaması ilə əsaslandırmaq da dilə xəyanətdir. Bütün texniki avadanlıqlar üçün əlifbamızın elektron variantı yaradılıb, zəhmət çəkin, o əlifbanı istifadə etdiyiniz avadanlığa endirin – ziyalı olmağın məsuliyyəti bunu tələb edir.
Amma dediyimiz kimi, “ə” hərfi Mehriban xanımın istifadə etdiyi avadanlıqda mövcuddur, əks halda o, mətnin böyük hissəsində bu hərfdən istifadə edə bilməzdi. Özü demiş, “demək”, dilə qarşı məsuliyyətsizlik, laqeydlik, biganəlik göstərib.
“20 Yanvar” sözünü kiçik, “şəhid”, “vətənpərvərlik” sözünü böyük yazmaq, “o ki qaldı” ifadəsindən sonra vergül qoymaq, vəzifə adının yazılış qaydasını bilməmək, sözləri bir-birinə bitişdirmək, durğu işarələrindən yerində istifadə etməmək və s. və i.a. isə artıq dilə laqeydlik deyil, savadsızlıqdır. Bir ssenaristə, rejissora, əməkdar incəsənət xadiminə, bədii rəhbərə yaraşmaz.
Mənim anlamımda bir ziyalının vətənpərvərliyi, milliliyi ilk növbədə ana dilinə münasibətindən başlayır. İnanmaq istərdim ki, Mehriban Ələkbərzadə dilə biganə yanaşmaqla özünün ictimai-sosial statusuna xələl gətirməkdən əl çəkəcək.
Axar.az
