Rusiyanın xarici işlər nazirinin müavini Mixail Qaluzin deyib ki, Ermənistan eyni vaxtda həm Avropa İttifaqı (Aİ), həm də Avrasiya İqtisadi İttifaqına (Aİİ) üzv ola bilməz.
Sitat:
“Ermənistan Avropanın seçdiyi yolla getsə, bu, İrəvanın Aİİ-dəki tərəfdaşları ilə iqtisadi münasibətlərinə yenidən baxılmasına gətirib çıxaracaq. Təəssüf ki, belə bir vəziyyət Ermənistan əhalisinə də təsir edəcək ağrılı bir prosesə yol açacaq”.
İrəvan bu hədə və xəbərdarlıqlara məhəl qoyacaqmı?
Politoloq Aytən Qurbanova deyib ki, Ermənistanın Avropa İttifaqına üzvlüyü ilə bağlı proses real tələblərlə heç bir halda üst-üstə düşmür:
“Yəni Ermənistan Aİ-nin minimum tələblərini belə qarşılamaq potensialına sahib namizəd deyil. Ona görə də, düşünmürəm ki, yaxın gələcəkdə bu istiqamətdə müsbət irəliləyiş olsun. Digər tərəfdən isə Avrasiya İqtisadi İttifaqına üzvlük bugünkü reallıqlarda Ermənistan üçün həyati önəm daşıyır.
Ümumi ticarət dövriyyəsinə və Aİİ-yə üzv ölkələrlə, xüsusilə də Rusiya ilə iqtisadi əlaqələrin inkişaf xronikasına nəzər yetirdikdə birtərəfli asılılıq aydın şəkildə müşahidə edilir. Deməli, bu istiqamətdə ola biləcək istənilən addım Ermənistan üzərində ciddi təsir gücünə malikdir.
Nəticə etibarilə Paşinyan administrasiyası sadəcə prosesləri manipulyasiya edərək manevr imkanı əldə etməyə çalışır. Çünki Ermənistanın Avropa İttifaqına üzvlük ehtimalı olmadığı kimi, Avrasiya İqtisadi İttifaqından uzaqlaşması da onun üçün acınacaqlı nəticələr yarada bilər”.
Globalinfo.az
