Gürcüstan Azərbaycanla ilk növbədə eyni coğrafi regionda - Cənubi Qafqaz regionunda yerləşir. Nəzərə almaq lazımdır ki, Qafqaz dünyanın ən əhəmiyyətli və ən həssas yanaşdığı regionlardan biridir. Cənubi Qafqazın Qərbdən giriş qapısı Gürcüstan hesab olunursa, ümumilikdə Cənubi Qafqazın əsas dövləti, dominant qüvvəsi, gücü və coğrafi baxımından Cənubi Qafqazın şimaldan cənuba, şərqindən qərbinə yerləşən dövləti Azərbaycandır.
Eyni zamanda Mərkəzi Asiyaya, Uzaq Şərqə doğru açılan və oradan gələn qapı da Azərbaycandır. Bu baxımdan Azərbaycanla Gürcüstanın Cənubi Qafqazda əhəmiyyətli ölkə olmaları amili var. Eyni zamanda qonşu dövlətik. Biz əsrlər boyu eyni imperiyanın tərkibində mövcud olmuşuq - Rusiya imperiyası, daha sonra Sovetlər İttifaqının tərkibində olmuşuq və müstəqilliyimizi də təxminən eyni vaxtda bərpa etmişik. Bu da ondan xəbər verir ki,
Azərbaycanla Gürcüstan bir sıra tarixi məqamları, dəyərləri bölüşür. Bununla yanaşı, müstəqillik dönəmində də münasibətlərimiz həmişə normal və inkişaf edən istiqamətdə olub. O zamanlar da Azərbaycanla Gürcüstan arasında münasibətlərin pisləşməsi üçün çalışan qüvvələr olub. Amma yürüdülən doğru xarici siyasət və qarşılıqlı münasibətlərin inkişaf etdirilməsi xətti bu prosesi kənarda qoyub. Bu gün də Azərbaycanla Gürcüstan arasında münasibətlərin inkişaf edən istiqamətdə olması deməyə çox ciddi əsaslar var.
Azərbaycanın bu günə qədər reallaşdırdığı bütün enerji, logistika, nəqliyyat layihələrinin demək olar ki, hamısı Gürcüstan ərazisindən keçir. Bakı-Tbilisi-Ceyhan, Bakı- Tbilisi-Ərzurum, Bakı-Tbilisi-Qars, Cənub Dəhlizi və bir sıra digər layihələr, eyni zamanda hazırda yaşıl enerjinin Avropaya ixrac edilməsi ilə bağlı böyük bir layihə və dünyada iki dövlət arasında münasibətlərin hansı istiqamətlərdə inkişaf etdirilməsi amilinə nəzər yetirsək - bura
siyasi, iqtisadi, enerji (əgər varsa), mədəni və nəqliyyat əlaqələrini aid etmək olar ki, bütün bunlar Azərbaycanla Gürcüstan arasında var və olmaqla yanaşı, həm də müsbət istiqamətdə inkişaf edir.
Bu baxımdan qarşılıqlı təmasların, səfərlərin reallaşdırılması, Azərbaycan Prezidentinin Gürcüstana səfəri, Azərbaycanın digər rəsmilərinin Gürcüstana səfərləri və Gürcüstan rəsmilərinin Azərbaycana səfər etməsi, Kavelaşvilinin Prezident seçildikdən sonra ilk səfərini Azərbaycana etməsi, bundan öncə seçkilərdən sonra Gürcüstanın Baş naziri Kobaxidzenin Azərbaycana səfər etməsi və eyni zamanda ayrı-ayrı beynəlxalq platformalarda bir-birimizə dəstəyin nümayiş etdirilməsi, eyni hədəfə istiqamətlənmiş mövqeyin sərgilənməsi onu deməyə əsas verir ki, Azərbaycanla Gürcüstan arasında münasibətlər iki dövlət və yaxud iki qonşu dövlət arasında ən ideal münasibətlərdir. Təbii ki, zaman-zaman bizim aramızda bəzi problemlər olub. Çünki problemlərin olması normaldır. Amma bu problemlər uzaqgörən siyasətlə, qarşılıqlı hörmətlə həllinə nail olunmuşdur.
Hafiz Məmmədov,
Mil-Muğan Regional Təhsil İdarəsi, Sabirabad rayon Təhsil sektorunun aparıcı
məsləhətçisi
