REAL Partiyasının sədri Natiq Cəfərli Bakı şəhər icra iakimiyyətinin başçısı Eldar Əzizovun tunellərdə hərəkətin məhdudlaşdırılması ilə bağlı təklifinə münasibət bildirib.
O, sosial şəbəkə hesabında paylaşımla merin fikirlərinə sərt şəkildə etiraz edib və bir sıra suallar səsləndirib.
1xeber.media Tribunainfo.az-a istinadla xəbər verir ki, Natiq Cəfərli Eldar Əzizovun “güclü yağışlar zamanı tunellərin su altında qalmasının qarşısını almaq üçün hərəkət məhdudlaşdırılsın” təklifini tənqid atəşinə tutub:
“Eldar Əzizov deyir ki, 2 ildən sonra Bakının su-kanalizasiya sistemi düzələcək, amma bu dövrdə, təxminən 750 gün ərzində güclü yağış yağsa, tunelləri, keçidləri qapadacaqlar ki, 21-ci əsrdə, şəhərin mərkəzində insanlar tunellərdə boğulub ölməsinlər.”
REAL sədri merin bu açıqlamasının ardınca bir neçə mühüm və məntiqli sual da ortaya qoyub:
“Eldar müəllim 2018-ci ildən Bakı meridir – bəs keçən 7 ildə bu problemi niyə həll etmədi?
Bakı Şəhər İcra Hakimiyyətinin su və kanalizasiya sisteminə nə aidiyyəti var? Mer “Azərsu”ya göstəriş verə bilərmi?
BŞİH, Azərbaycan Avtomobil Yolları Dövlət Agentliyinə tunellərlə bağlı əmr verə bilərmi?
BŞİH-nin Bakı təsərrüfatını idarə edən 14-ə yaxın mərkəzi dövlət qurumuna hər hansı səlahiyyəti varmı?
Əgər bu qədər səlahiyyətsizdirsə, Eldar Əzizov nəyə əsasən deyir ki, problemi 2 ilə həll edəcək?”.
N. Cəfərli həmçinin bildirib ki, Bakı şəhəri bir mərkəzdən idarə olunmalıdır və bunun üçün seçkili “Böyük Şəhər Bələdiyyəsi” formalaşdırılmalı, mer vəzifəsi təsis edilməlidir:
“Dəfələrlə bu haqda demişik, bir də təkrar edək: Bakı şəhəri vahid, seçilmiş mərkəzdən idarə olunmalı, səlahiyyət və məsuliyyət bir mərkəzdə toplanmalıdır.”
Qeyd edək ki, Eldar Əzizovun tunellərlə bağlı təklifi son günlər sosial şəbəkələrdə də geniş müzakirələrə və tənqidlərə səbəb olub.
