Bakı Şəhər İcra Hakimiyyətinin başçısı Eldar Əzizovun son çıxışı müzakirələrə səbəb olub. Belə ki, o, güclü yağıntılar zamanı təhlükəni minimuma endirmək məqsədilə tunellərə və körpüaltı keçidlərə nəqliyyat vasitələrinin girişinə məhdudiyyət qoyulmasını təklif edib. Bu fikir sosial şəbəkələrdə birmənalı qarşılanmayıb və “absurd” olduğu bildirilib.
Yağıntılar zamanı tunelə girişin qadağan edilməsi çıxış yoludurmu?
Nəqliyyat eksperti Eldəniz Cəfərov Bakı merinin fikirlərini dəstəkləyib:
“Eldar Əzizov çıxışı zamanı subasma ilə bağlı doğru və həll edilməli iki vacib məsələni diqqətə çatdırıb. Deyib ki, həmin ərazidə kanalizasiyanın ötürücülüyü yenidən təmin edilməli, su boruları dəyişdirilməli, yeni sistem qurulmalı və bunun üçün vəsait ayrılmalıdır. Paralel olaraq, bildirib ki, qeyd olunan ərazi bu qədər insanın yaşaması və çox sayda tikintilərin olmasına hesablanmayıb. Həmçinin tikintidəki özbaşınalığı da nəzərə çatdırıb. Fikrimcə, tuneli su basarsa, nəqliyyat vasitələrinin hərəkətini məhdudlaşdırıb, sürücülərin ora daxil olmasının qarşısını almaq lazımdır. Bakı meri həmin an atılmalı addımları qeyd edib”.
Ekspert deyib ki, sosial şəbəkələrdə paylaşılan fikirlər önəmli deyil:
“İstifadəçilər bu gün oğrunu da, qatili də qəhrəman edə bilərlər. Hər şeyə sərt yanaşmaq olmaz. Eldar Əzizov isə mövcud situasiyadan çıxış yolunu göstərib. Söhbət tunellərdə daimi məhdudiyyət tətbiq etməkdən getmir. Həmin an lazımlı tədbirlərin görülməsi vacibdir və bu, müzakirə edilib”
Globalinfo.az
