Ləğv edilmiş qondarma rejimin “təhlükəsizlik şurasının” keçmiş katibi, Xocalı qatili Vitali Balasanyan Rusiya prezidenti Vladimir Putinə açıq məktubla müraciət edərək, sonuncunun vasitəçiliyi ilə ermənilərin Qarabağa qayıdacağına ümid etdiyini bildirib.
1xeber.media bildirir ki, Balasanyan bu il Sovet İttifaqının faşist Almaniyası üzərində Böyük Qələbənin 80-ci ildönümünün qeyd olunduğunu xatırladaraq, erməni xalqının da həmin böyük və ümumi qələbəyə öz qəhrəmanlıq töhfəsini verdiyini və Böyük Vətən Müharibəsində iştirak edən ermənilərdən 90 min nəfərinin (?) “artsax”dan olduğunu vurğulayıb. Balasanyan yalanın barıtını o qədər çox edib ki, heç Qarabağda o qədər erməni yaşamayıb.
“Bu gün Qarabağ erməniləri bir sıra şəraitə görə öz tarixi vətənlərindən məhrumdurlar və hesab edirik ki, bu ədalətsiz prosesi rus xalqı və Rusiya dövləti dəyişdirə bilər. Əsrlər boyu Rusiya imperiyası dəfələrlə erməni xalqına öz tarixi vətənində öz kimliyini və dövlətçiliyini qoruyub saxlamaq imkanı verib”, – Qarabağdan qaçmış Balasanyan çərənləyib.
