Media Təhlil Mərkəzinin (MTM) Dövlət Statistika Komitəsi və Mərkəzi Bankın rəsmi məlumatları əsasında apardığı təhlilə görə, son dörd il ərzində Azərbaycanda əhalinin nominal gəlirləri üzrə artım dinamikası davam edib.
1xeber.media xəbər verir ki, bununla bağlı “Təhlil.az” teleqram kanalı məlumat yayıb.
Bildirilib ki, 2021-ci ilin I rübündə əhalinin nominal gəlirlərinin həcmi 13,5 milyard manat idisə, son 4 ildə bu göstərici 53,8% və ya 7,2 milyard manat artıb. 2025-ci ilin yanvar-mart aylarında isə ölkə əhalisinin nominal gəlirləri 20,7 milyard manat təşkil edib və bu da 2024-cü ilin eyni dövrünə nisbətən 6,6 faiz və ya 1,3 milyard manat çox deməkdir.
Məlumat üçün bildirək ki, əhalinin nominal gəlirləri dedikdə, əhalinin müəyyən dövr ərzində əldə etdiyi bütün pul gəlirlərinin (əməkhaqqı, pensiya, müavinət, sahibkarlıq gəlirləri və s.) ümumi məbləği nəzərdə tutulur. Bu göstərici gəlirlərin faktiki miqdarını əks etdirir və inflyasiya nəzərə alınmadan hesablanır.
Son 4 ildə əhalinin adambaşına düşən nominal gəlirlər üzrə də artım dinamikası davam edib. Cari ilin yanvar-mart aylarında adambaşına düşən nominal gəlir 2024-cü ilin I rübü ilə müqayisədə 6,2% və ya 117,2 manat artaraq 2 022,6 manata çatıb. Ötən il isə artım dinamikası 4.5% olmuşdu.
Ümumilikdə son 4 ildə əhalinin hər bir nəfərinə düşən nominal gəlir həcmi 50,4% və ya 677,7 manat artıb.
2024-cü ilin yanvar-mart ayları ilə müqayisədə 2025-ci ilin eyni dövründə orta illik inflyasiya göstəricisi 5,6% təşkil edib. Həmin dövrdə əhalinin adambaşına düşən nominal gəlir daha çox – 6,2% artıb. Qeyd olunan tendensiya əvvəlki illərdə də bənzər şəkildə müşahidə olunub.
2022 və 2023-cü illərin birinci rübləri arasındakı müddətdə orta illik inflyasiya ən yüksək həddə (13,8%) çatdığı halda, adambaşına düşən nominal gəlir daha yüksək (14,5%) olub.
Ümumilikdə isə 2021-ci ilin birinci rübündən 2025-ci ilin birinci rübünədək olan dövrdə inflyasiya 36,2% olduğu halda, əhalinin adambaşına düşən nominal gəlirləri 50,4% artıb.
Rəsmi rəqəmlərə əsasən, cari ilin yanvar-fevral aylarında ölkədə orta aylıq əməkhaqqı ötən ilin eyni dövrü ilə müqayisədə 10,2% və ya 96,8 manat artaraq 1 043,6 manat təşkil edib. Son 4 ildə bu göstərici üzrə artım tepmi 10%-dən yuxarı olub.
Xatırladaq ki, 2021-ci ilin yanvar-fevral aylarında orta aylıq nominal əməkhaqqı 692,3 manat idisə, son 4 ildə orta aylıq əməkhaqqı 50,7% və ya 351,3 manat artıb.
