Prezident İlham Əliyevin sərəncamı ilə Xalq artisti Arif Babayev Heydər Əliyev Mükafatına layiq görülüb. O, Azərbaycan mədəniyyətinin inkişafında xüsusi xidmətlərinə görə bu mükafata layiq görülüb.
1xeber.media xəbər verir ki,Modern.az sərəncamla əlaqədar Arif Babayevlə əlaqə saxlayıb.
O, Prezident İlham Əliyevə göstərdiyi diqqətə görə təşəkkür edib: “Ulu öndərin adını daşıyan mükafata layiq görülmək mənim üçün xoşbəxtlikdir. Ümummilli lider Heydər Əliyev də, cənab Prezident İlham Əliyev də hər zaman mədəniyyət sahəsində fəaliyyət göstərən sənətkarlara diqqət göstərib”.
Qeyd edək ki, Arif Babayev Azərbaycanın muğam ifaçılığı sahəsində sistemli pedaqoji yanaşmanı formalaşdırmış və bu sənəti peşəkar səviyyəyə çatdırmaqda mühüm rol oynamış sənətkarlardandır. O, 1938-ci ildə Ağdamda anadan olub. 1970-ci illərdən etibarən həm səhnədə, həm də muğam tədrisində aktiv fəaliyyət göstərməyə başlayıb.
Arif Babayevin ifasında "Bayatı-Şiraz", "Rast", "Şur", "Segah", "Çahargah" kimi əsas muğam dəstgahları Azərbaycan muğam fondunun qızıl arxivinə daxil edilib. O, təkcə klassik muğamları deyil, eyni zamanda xalq mahnıları və təsnifləri də səsləndirərək repertuar zənginliyi ilə seçilib.
Arif Babayevin sənət fəaliyyəti dövlət tərəfindən yüksək qiymətləndirilib – o, Xalq artisti fəxri adı, “Şöhrət” və “Şərəf” ordenləri ilə təltif olunub. Onun fəaliyyəti Azərbaycan muğam sənətinin arxivləşdirilməsi, sistemləşdirilməsi və tədris bazasının formalaşmasında mühüm mərhələ hesab olunur.
