NATO-nun Baş katibi Mark Rutte Ukrayna münaqişəsi ilə bağlı yaxın günlərdə vəziyyətin dəyişməsinin mümkün olduğunu bəyan edib. Onun sözlərinə görə, növbəti 10 gün ərzində münaqişənin həlli prosesinin irəliləməsi üçün yeni fürsət yarana bilər.
NATO rəsmisi bunun Vaşinqton və Kiyev rəhbərlərindən asılı olduğunu, həmçinin Türkiyənin də vacib rol oynayacağını söyləyib. Ruttenin alyansa üzvlüklə bağlı açıqlaması isə xüsusi diqqət çəkib. O vurğulayıb ki, Ukrayna və ya başqa bir ölkəyə sülh müqaviləsinin bir hissəsi kimi NATO üzvlüyünün danışıqlar masasında yer alacağına dair heç vaxt söz verilməyib.
1xeber.media xəbər verir ki,Globalinfo.az-a danışan siyasi şərhçi Cavanşir Abbaslı qeyd edib ki, Ruttenin açıqlamalarında yalnız bir real məqam var:
“Bəli, Türkiyə bu prosesdə artıq vasitəçi ölkə kimi əsas mövqedədir. Son İstanbul görüşü də bunun açıq göstəricisidir. Ruttenin digər fikirləri isə Ukraynanı növbəti dəfə qızışdırmağa və Qərbin ikiüzlü siyasətinə xidmət edir.
Ərazisində münaqişə olan heç bir ölkə NATO-ya üzv qəbul edilə bilməz. Bu isə bir daha onu göstərir ki, NATO-nun əvvəlki illərdə Gürcüstan və Ukrayna ilə bağlı verdiyi vədlər sadəcə siyasi təzyiq aləti olub.
Alyans əvvəllər Tbilisini, daha sonra Kiyevi quruma üzv qəbul ediləcəkləri vədini versə də, bu, reallaşmadı. İndi Ruttenin bəyanatları, sanki müharibəni Rusiya başlatmayıb və o, münaqişənin tərəfi deyilmiş kimi təsəvvür yaradır. Guya anlamırlar ki, bu müharibənin baş memarı Moskva olduğu kimi, məsələni bitirəcək əsas aktor da odur”.
C.Abbaslının sözlərinə görə, Rusiya Prezidenti Vladimir Putin hələ də danışıqlar masasına əyləşmək fikrində deyil və Ukrayna lideri Volodimir Zelenskini legitim tərəf kimi tanımır:
“Bu isə yaxın 10 gündə vəziyyətin dəyişəcəyinə dair nikbin proqnozların real olmadığını göstərir. Mövcud müharibə əslində Rusiya-Qərb, xüsusilə də Rusiya-ABŞ qarşıdurmasıdır. Sonda atəşkəs masasında əsas tərəflər də elə Vaşinqton və Moskva olacaq. Avropa ölkələri isə sadəcə öz maraqları üçün fürsət axtaracaq.
Ukrayna bu müharibəni bitirə biləcək gücə malik deyil və prosesin taleyi Qərbdəki dairələrin qərarlarından asılıdır.
Əgər onlar müharibənin bitməli olduğunu desələr, Zelenski Putinlə birbaşa dialoqa girmədən belə kapituliyasiya sənədinə imza ata bilər. Çünki başqa alternativ qalmayıb. NATO Ukraynanı çoxdan satmışdı, bu, artıq sirr deyil. 2008-ci ilin Gürcüstanı və 2014-cü ilin Ukraynası bunun açıq sübutudur. Təəssüf ki, həmin dərslərdən nəticə çıxarılmadı”.
