ABŞ-ın Ədliyyə Nazirliyi Kanadanın “Bombardier” şirkəti ilə bağlı həyata keçirilən korrupsiya istintaqına xitam verib. Sözügedən istintaq çərçivəsində Azərbaycanın keçmiş nəqliyyat naziri Ziya Məmmədov, onun müavini, “Azərbaycan Dəmir Yolları” QSC-nin keçmiş rəhbəri Arif Əsgərovun da adları hallanırdı.
Bu xitam qərarını hüquqi baxımdan necə qiymətləndirmək olar? Bu cür qərarlar adətən hansı səbəblərə əsaslanır?
1xeber.mediaxəbər verir ki.Globalinfo.az-a danışan Hüquq və Siyasi Araşdırmalar Mərkəzinin sədri, politoloq Xəyal Bəşirov deyib ki, hər hansı cinayət işinə xitam verilməsi halları qanunvericilikdə nəzərdə tutulub:
“Bu, hüquqi baxımdan mümkün olan məsələdir. Amma söhbət 100 milyonlarla ABŞ dolları həcmində məbləğin bu və ya digər formada dövriyyəsindən, yaxud korrupsiya hallarından bəhs edən cinayət işindən gedirsə, bu, xitam prosesini çətinləşdirir. Bu o demək deyil ki, mümkünsüzdür. Hər bir halda, cinayət işinə xitam verilməsi halı ilə bağlı ictimaiyyətə geniş məlumat verilməyib”.
Hüquqşünas bildirib ki, beynəlxalq səviyyədə rezonans doğuran araşdırmalar zamanı siyasi yanaşma da müzakirə obyektidir:
“Yəni Ziya Məmmədovun adının hallandığı cinayət işinə məhz indiki məqamda xitam verilməsi Donald Tramp administrasiyasının fəaliyyəti kimi də qəbul edilə bilər. Belə ki, hələ Ağ Ev rəhbərinin ilk prezidentliyi dönəmində eşitmişdik ki, Ziya Məmmədov və onun oğlu ilə Donald Tramp və ailə üzvlərinin yaxın əlaqələri var. Bu amilin də qərara təsir etməsi mümkündür. Düşünürəm ki, Tramp üçün bir çox mənalarda şəxsi münasibətlər daha önəm kəsb edir, nəinki digər məsələlər”.
X.Bəşirov qeyd edib ki, sözügedən qərarla bağlı detalları açıq şəkildə bəyan edildikdən sonra bilmək olar:
“Yaxud ən doğru cavabı geci Trampın indiki prezidentliyi dönəmi bitdikdən sonra, yəni 2028-ci ilin sonu və ya 2029-cu ildə görəcəyik. Xüsusilə də demokratlar hakimiyyətə gələrsə, cinayət işi yenidən bərpa edilərsə, o zaman hazırkı ABŞ prezidentinin şəxsi müdaxiləsi və ya göstərişinin olub-olmadığını biləcəyik. Fikrimcə, Azərbaycanın belə məsələlərdə adının hallanması xoşagəlməz haldır. Buna səbəb olan insanlar da məsuliyyətlərini dərk etməlidirlər. Lakin xitam qərarı heç də məsələnin həll edilməsi demək deyil. Belə halların qarşısı alınmalı və gələcəkdə də buna yol verilməməlidir”.
Xatırladaq ki, 2013-cü ildə Azərbaycanın Nəqliyyat Nazirliyi ilə Kanada şirkəti arasında Azərbaycan dəmir yollarının Bakı-Qazax-Böyük Kəsik hissəsində siqnal avadanlıqlarının quraşdırılmasına dair müqavilə bağlanıb. Layihənin icraçısı olaraq şirkətin İsveçdəki törəmə şirkəti “Bombardier Transportation” çıxış edib. Layihənin ümumi dəyəri isə 350 milyon dollar təşkil edib. Araşdırma müəyyən edib ki, bu məbləğin təqribən 100 milyon dolları ofşor şirkətlər vasitəsilə Nəqliyyat Nazirliyinin yüksəkvəzifəli məmurlarına mənfəət kimi geri qaytarılıb.
Həmin dövrdə Nəqliyyat Nazirliyinə Ziya Məmmədov, nazirliyin strukturuna daxil olan Azərbaycan Dəmir Yollarına” isə Arif Əsgərov rəhbərlik edirdi.
