Böyük Britaniya hökumətinin bazar ertəsi təqdim edəcəyi strateji müdafiə icmalında Rusiyadan gələn təhlükə "birbaşa və təxirəsalınmaz" kimi qiymətləndiriləcək.
1xeber.media "The Guardian"a istinadən xəbər verir ki, 130 səhifəlik sənəd baş nazir Kir Starmerin üç müşaviri tərəfindən hazırlanıb və əsasən Ukrayna müharibəsindən çıxarılan dərslərə əsaslanacaq.
Sənəddə vurğulanır ki, Britaniya "təhlükələrin yeni dövrü" ilə üz-üzədir - bu dövrdə pilotsuz uçuş aparatları, süni intellekt və digər texnologiyalar müharibənin xarakterini tarixdə görünməmiş dərəcədə köklü şəkildə dəyişir.
Hesabatda Çin də qeyd olunur - o, düşmən kimi göstərilməsə də, "mürəkkəb və davamlı çağırış" kimi təsvir edilir. Bildirilir ki, Pekin bəzən Moskva ilə əməkdaşlığa meyil göstərir. Sənəddə həmçinin İran və Şimali Koreya "regional pozucular" kimi dəyərləndirilir.
Analitik sənəddə müdafiə xərclərinə dair yeni öhdəliklərin yer alacağı gözlənilmir. Bunun əvəzinə, Starmerin bu ilin fevralında verdiyi vədi - 2027-ci ilə qədər müdafiə büdcəsinin ÜDM-in 2,5%-nə çatdırılması və növbəti parlament dövründə 3%-ə qaldırılması - bir daha təsdiqlənəcək.
İcmalda Britaniya ordusunun say tərkibinin artırılması məsələsi də qaldırılacaq. Rəqəmlərə görə, ordunun sayı hədəf göstəricilərdən aşağı düşüb və bu, Napoleon dövründən bəri ən aşağı səviyyəyə enib. 1 aprel tarixinə tam təlim keçmiş əsgərlərin sayı 70 860 nəfər təşkil edib ki, bu da ötən illə müqayisədə 2,3% azdır.
Britaniyanın keçmiş milli təhlükəsizlik müşaviri Piter Rikets bildirib ki, pilotsuz uçuş aparatları, kibermüdafiə və süni intellektə daha çox vəsait ayırmaq məqsədəuyğundur. "Lakin Ukrayna müharibəsinin başqa bir dərsi də var – kütlə önəmlidir, istər canlı qüvvə, istərsə də texnika baxımından. Buna görə də sonda ÜDM-in 3,5%-i həcmində resurs tələb olunacaq", deyə o bildirib.
