Bakı üzrə attestat qiymətləri əla olan abituriyentlərindən 3,95 %-i 200 baldan aşağı nəticə göstərib.
1xeber.media report-a istinadla xəbər verir ki, bu barədə Dövlət İmtahan Mərkəzinin nəşr etdiyi 2024-2025-ci tədris ili üçün tələbə qəbulu və ümumi təhsil müəssisələri üzrə buraxılış imtahanlarının nəticələrinə dair elmi-statistik materialların əks olunduğu “Abituriyent 12” jurnalında qeyd olunub.
Bildirilib ki, ötən il şəhərin ümumtəhsil müəssisələrini 28 min 203 şagird bitirib və onların 28 min 115 nəfəri buraxılış imtahanında iştirak edib.
Şəhərin məzunlarının buraxılış imtahanında tədris dili fənni üzrə topladıqları orta bal (62,03) respublika üzrə orta göstəricidən 11,66 %, riyaziyyat fənni üzrə topladıqları orta bal (38,05) 11,59 %, xarici dil fənni üzrə topladıqları orta bal (51,73) 21,12 %, hər üç fənn üzrə birlikdə topladıqları orta bal (151,80) isə 14,92 % yuxarıdır.
Buraxılış imtahanında tədris dili fənni üzrə məzunların 12,78 %-i 30 və daha az, 43,89 %-i 30-70 intervalında, 43,33 %-i 70-dən çox bal toplayıb. Riyaziyyat fənni üzrə bu göstəricilər müvafiq olaraq 52,82 %, 27,85 % va 19,33 %, xarici dil fənni üzrə isə 30,29 %, 37,26 % və 32,46 % olub. Ümumilikdə 28 min 113 nəfər attestat alıb.
Attestat alanların 77,61 %-i (21 min 819 nəfəri) I-IV qruplar üzrə qəbul imtahanlarında iştirak edib, 92,48 %-i (26 min nəfəri) isə buraxılış imtahanlarının nəticələri əsasında V qrupa daxil olan ixtisaslar üzrə müsabiqədə iştirak etmək üçün ərizə verib.
Qəbul imtahanlarının nəticələrinə əsasən, şəhərin 14 min 225 məzunu (imtahanlarda iştirak edənlərin 54,71 %-i) tələbə adını qazanıb. Onların 53,08 %-i (7551 nəfəri) dövlət, 3,53%-i (502 nəfəri) özəl ali təhsil müəssisələrinə dövlət sifarişi üzrə, 31,36 %-i (4461 nəfəri) dövlət, 12,03 %-i (1711 nəfəri) özəl ali təhsil müəssisələrinə ödənişli əsaslarla qəbul olub.
Şəhərin məzunlarının 3073 nəfəri 500-dən, o cümlədən 964 nəfəri 600-dən yuxarı bal toplayıb. Abituriyentlərin ən çoxu Bakı Dövlət Universiteti və Azərbaycan Dövlət Pedaqoji Universitetinə qəbul olub. Abituriyentlərin göstəriciləri bal intervalları üzrə aşağıdakı kimi paylanıb:
0-100 intervalında 8,24 % (1798 nəfər), 100-200 intervalında 23,82 % (5197 nəfər), 200-300 intervalında 21,83 % (4763 nəfər), 300-500 intervalında 32,03 % (6988 nəfər), 500-dən yuxarı 14,08 % (3073 nəfər). Beləliklə, şəhər abituriyentlərinin yalnız 46,11 %-i 300-dən yuxarı bal toplayıb.
Şəhərin attestat qiymətləri əla olan abituriyentlərindən 3,95 %-i 200 baldan aşağı nəticə göstərib. 500 baldan yuxarı nəticə göstərərək məktəb nailiyyətlərini təsdiq edənlər isə cəmi 50,44 %-dir.
