Tovuz rayonu Əlimərdanlı kənd tam orta məktəbinin müəlliminin barmağına təmtəraqlı şəkildə üzük taxılması görüntüləri cəmiyyətdə ciddi müzakirələrə səbəb olub. Sosial şəbəkələrdə paylaşılan videoda bir neçə qadının sıraya düzülərək Günel adlı müəllimənin barmağına üzük taxdığı görünür.
Məsələ ilə bağlı Teleqraf-ın sorğusuna cavabda Qazax-Tovuz Regional Təhsil İdarəsi bildirib ki, görüntülərlə bağlı araşdırma aparılır:
“Qeyri-iş günü olduğu üçün dəqiqləşdirmə aparmaq çətindir. Fakt dəqiqləşdikdən sonra məlumat veriləcək”.
Teleqraf-ın əldə etdiyi məlumata görə, adı hallanan müəllim Azərbaycan Beynəlxalq Universitetində təhsil alıb. 2013–2014-cü illərdə imtahan yolu ilə Mərdan Musayev adına Əlimərdanlı kənd tam orta məktəbində işləməyə başlayıb. İlk illərdə ibtidai sinif müəllimi işləməyib, sadəcə müxtəlif yığma dərsləri tədris edib.
Görüntülərin Tovuz rayonunda yerləşən restoranlardan birində çəkildiyi və tədbirdə valideynlərlə yanaşı bəzi müəllimlərin də iştirak etdiyi deyilir.
Qeyd edək ki, məsələyə münasibət öyrənmək üçün Əlimərdanlı kənd M.Musayev adına tam orta məktəbin direktoru Cavid Yusifovla əlaqə saxlamağa cəhd etdik. Lakin o, zənglərimizə cavab vermədi.
