Son illər qəbul imtahanlarında yüksək nəticə göstərən şagirdlər və xarici ali təhsil müəssisələrinə tam təqaüdlə daxil olan gənclər arasında qızlar üstünlük təşkil edir. Oğlanların təhsildə əvvəlki aktivliyi və uğuru getdikcə azalır. Bu tendensiya cəmiyyətin sosial strukturu və gender rolları baxımından ciddi narahatlıq doğurur.
Hazırkı vəziyyətin səbəbi nədir? Oğlanların ali təhsilə marağının artırılması və dərs göstəricilərinin yüksəldilməsi üçün hansı addımlar atılmalıdır?
Globalinfo.az-a danışan sosioloq Yusif Nəbiyev deyib ki, oğlan uşaqlarına erkən yaşlardan müxtəlif qeyri-akademik rollar yüklənir:
“Oğlan uşaqları sabahın “ailə dayağı” və ya “pul qazananı” kimi böyüdülür. Nəticədə onlar daha tez maddi qazanc əldə etmək üçün texniki peşələrə və ya qanunsuz qazanc yollarına yönəlirlər. Bu, akademik uğura olan motivasiyanı ciddi şəkildə azaldır. Paralel olaraq, qızlar öz ayaqları üstündə durmaq üçün daha çox təhsilə yönləndirilirlər. Maraqlıdır ki, eyni sistem oğlanlara yük, qızlara isə yeganə çıxış yolu kimi görünür”.
Ekspert bildirib ki, problemin həlli üçün sistemli yanaşma və ciddi struktur islahatları lazımdır:
“Birincisi, oğlanlara akademik uğurun da sosial status və nüfuz qazandıra biləcəyi fikri aşılanmalıdır. İkincisi, məktəblərdə kişi müəllimlərin sayı artırılmalıdır. Onlar rol modeli baxımından oğlanlara təsir edə bilərlər. Əks halda, təhsil onların gözündə “qız işi” kimi görünür. Üçüncüsü, təhsil sisteminin əmək bazarı ilə əlaqəsi qurulmalıdır. Göstərilməlidir ki, təhsil sayəsində uğurlu karyera qurmaq, yaxşı gəlir və hörmət qazanmaq mümkündür. Ciddi addımlar atılmasa, oğlan uşaqları təhsildən uzaqlaşaraq küçələrə, kriminal mühitə yönələcəklər. Bu, artıq fərdi yox, cəmiyyətin gələcəyini təhdid edən ciddi sosial problemdir”.
