Ginnesin Rekordlar Kitabı Madriddəki "Sobrino de Botin" restoranını dünyanın ən qədim ictimai iaşə müəssisəsi adlandırır. Lakin onun planetdə fəaliyyət göstərən ən qədim restoranın əslində özü olduğunu iddia edən bir rəqibi var.
1xeber.media xəbər verir ki, bu barədə "Independent" yazıb.
Ginnesin Rekordlar Kitabına görə, "Sobrino de Botin" 1725-ci ildən fasiləsiz fəaliyyət göstərir - tam üç əsrdir. Əlbəttə ki, bu, tarix çalarları ilə Kastiliya mətbəxinin yeməklərini dadmaq istəyən ziyarətçi kütlələrini cəlb edir.
Lakin Madridin kənar ərazilərində, suvenir mağazaları və turistik yerlərdən uzaqda, sahibləri öz müəssisəsini şəhər mərkəzindəki rəqibindən daha qədim adlandıran "Casa Pedro" kənd tavernası yerləşir.
"Bir kimsəyə "Bəli, biz 1702-ci ildən fəaliyyət göstəririk" dediyiniz zaman bu həqiqətən də əsəbləri gərildir. Amma, bunu sənədlə təsdiqləyə bilmirsiz. Restoranın loqosuna baxsanız, orada "Casa Pedro, 1702-ci ildən" yazılıb. Biz də fikirləşdik: "Gəlin bunu sübut etməyə çalışaq", deyə restoranın səkkizinci nəsil sahibi İren Qinyales bildirib.
Beləliklə, qadın bir tarixçi işə götürüb və hazırda restoranın ən azı 1750-ci ildə fəaliyyət göstərdiyini təsdiqləyən sənədlər tapıb. Amma "Sobrino de Botin"i rəsmi şəkildə keçmək üçün bu kifayət deyil.
"Independent" qeyd edir ki, əslində hər iki müəssisənin çox ortaq cəhətləri var:
* Hər ikisi ailə əsilli irsi biznesdir.
* Hər ikisi duzlu mal əti (callos) və südəmrişi donuz (cochinillo) kimi klassik Kastiliya yeməklərini təklif edir.
* Hər ikisi klassik İspaniya plitələri ilə bəzədilib, açıq taxta şüalı tavanlara və yeraltı şərab zallarına malikdir.
* Hər ikisi zəngin və maraqlı tarixə malikdir.
"Sobrino de Botin"in Truman Kapote, Frensis Skott Fitscerald və Qrem Qrin kimi "ədəbi himayədarlar" siyahısı var. Ernest Heminquey "Günəş də doğur" kitabında onu "dünyanın ən yaxşı restoranlarından biri" adlandırıb.
"Casa Pedro" isə İspaniya kral ailəsinin rəğbəti ilə fəxr edə bilər. Burada müxtəlif illərdə keçmiş İspaniya kralı I Xuan Karlosun restoranın bir otağında nahar etdiyi çoxlu fotoşəkillər asılıb. Onun oğlu, hazırkı İspaniya monarxı Kral Filip VI da burada nahar edir, ancaq atası qədər diqqət çəkmir.
Eyni zamanda, hər iki restoran bir qədər fərqli dünyalarda mövcuddur. "Casa Pedro" bir zamanlar Madriddən Fransaya aparan yeganə yol üzərində dayanacaq kimi yaranıb. Zaman keçdikcə Madrid bu ərazini özünə qatıb, amma bu yenə də şəhərin kənarıdır. Müəssisənin müştəriləri əsasən tarixi statusunun xüsusi əhəmiyyət kəsb etmədiyi yerli daimi ziyarətçilərdir.
Digər tərəfdən, "Sobrino de Botin" Madridin məşhur Plasa Mayor meydanından bir addımlıq məsafədə yerləşir və burada həmişə çoxlu turist olur. Müəssisənin sahibi Antonio Qonsales etiraf edib ki, 1987-ci ildə Ginnesin Rekordlar Kitabına düşmə biznesə kömək edib, lakin onsuz da bu həmişə kifayət qədər məşhur müəssisə olub.
Ginnesin Rekordlar Kitabının nümayəndəsi Kayli Hellovey qeyd edir ki, "ən qədim müəssisə" rəsmi statusu yalnız "uzun illər ərzində restoranın fəaliyyətinin əhəmiyyətli sübutları və sənədləri" əsasında verilir. Bu meyar o deməkdir ki, "Botin"dən daha uzun müddət fəaliyyət göstərən, lakin sənədli sübutları olmayan restoranlar belə rekordçu sayıla bilməz.
Bu, təkcə "Casa Pedro"ya deyil, həm də Parisdəki "Le Procope" (iddiaya görə 1686-cı ildə yaradılıb), Pekindəki "Bianyifang" (1416-cı ildə yaradılıb) və ya ABŞ-nın Rod-Aylend ştatının Nyuport şəhərindəki "White Horse Tavern" (1673-cü ildə yaradılıb) kimi bir neçə əsr fəaliyyət göstərən bir çox müəssisələrə aiddir.
