Azərbaycanda əməkhaqqı və sosial ödəniş kartlarının hansı bankdan alınacağına vətəndaşların özlərinin qərar verməsi məsələsi yenidən gündəmə gəlib. Mərkəzi Bank bu istiqamətdə aidiyyəti qurumlarla birlikdə müzakirələr aparır. Məqsəd insanların maaş və sosial ödənişlərini istədikləri bank vasitəsilə ala bilməsini təmin etməkdir.
Bəs bu dəyişiklik nə vaxt qüvvəyə minə bilər?
1xeber.media xəbər verir ki,Globalinfo.az-a danışan iqtisadçı Eyyub Kərimlinin fikrincə, bu, müsbət bir haldır.
Onun sözlərinə görə, belə bir qərardan sonra insanlar artıq hər hansı bir banka bağlı qalmayacaq və özlərinə yaxın, uyğun hesab etdikləri istənilən bankdan əməkhaqqı kartlarını əldə edə biləcəklər:
“Digər tərəfdən, bu qərar ölkədə banklar arasında rəqabəti artıracaq. Çünki bəzi hallarda müşahidə edirik ki, ölkədəki əməkhaqqı kartlarının əksəriyyəti iki böyük banka yönəldilib. Yeni yanaşma isə həm rəqabət mühitini gücləndirəcək, həm də vətəndaşlar üçün əlçatanlığı təmin edəcək. Xüsusilə regionlarda bu, mühüm əhəmiyyət daşıyır və bankların həmin bölgələrdə filial açmasını təşviq edə bilər”.
İqtisadçı mövcud məsələlər ətrafında müzakirələr aparıldığını vurğulayıb:
“Dünən də iqtisadçılarla görüşdə Mərkəzi Bankın sədri Taleh Kazımov mövzuya dair fikirlərini bölüşdü və bildirdi ki, bu, artıq texniki məsələdir. Yəqin ki, müzakirələr zamanı konkret həll yolları müəyyən olunacaq. Hazırda prosesin nə zaman baş tutacağı ilə bağlı dəqiq fikir bildirmək çətindir”.
İqtisadçı Fuad İbrahimov deyib ki, Mərkəzi Bankın sədri Taleh Kazımov görüş zamanı bu məsələ ilə bağlı xüsusi açıqlama verib:
“Hazırda Mərkəzi Bank bu prosesin icra mexanizmini hazırlayır və yaxın gələcəkdə vətəndaşlar əməkhaqqı kartlarını sərbəst şəkildə seçə biləcəklər. Görüş zamanı ekspertlər və mütəxəssislər xüsusilə dövlət orqanlarında, dövlət qulluğunda çalışan şəxslərin maaş kartı seçimində sərbəst olmaları məsələsini qaldırdılar. Qeyd olundu ki, bu, texniki baxımdan artıq mümkündür. Sadəcə olaraq, tətbiq mexanizmləri hazırlanır. Eyni zamanda vurğulandı ki, gələcəkdə bu imkanların özəl sektorda çalışanlar üçün də yaradılması vacibdir”.
F.İbrahimovun bildirib ki, ekspertlərin fikrincə, vətəndaş maaş kartının hansı banka bağlı olacağını özü seçə bilməlidir:
“O mənada Mərkəzi Bankın siyasəti bu təşəbbüsə dəstək vermək üzərində qurulub. Hesab edirəm ki, ilin sonunadək bu istiqamətdə konkret addımlar atılacaq və biz artıq prosesin icrasını müşahidə edə biləcəyik”.
