Azərbaycanda tikinti sektoru tez-tez bu sahədə çalışan insanların hüquqlarının pozulması məsələsi ilə gündəmə gəlir. Əmək müqavilələri formal, maaşlar qeyri-rəsmi, iş saatları isə istismarçılıq üçün əlverişli olur. Redaksiyamıza daxil olan növbəti şikayət də bunu təsdiqləyir.
Bu dəfə müraciət “Aral Group” tikinti şirkətində mühasib köməkçisi vəzifəsində çalışmış Cavid Əliyevdən gəlib.
Şikayətçinin bildirdiyinə görə, şirkətdə əməkdaşlar yalnız rəsmi iş saatları ilə deyil, qeyri-rəsmi şəkildə daha saatlarla işləməyə məcbur edilir:
“Mən 10 ay rəsmi olaraq “Aral Group” tikinti şirkətində mühasib köməkçisi vəzifəsində çalışmışam. Normalda iş saatı 09:00-da başlayaraq 18:00-da bitir. Lakin mənim işim 08:00-dan 18:00-a kimi idi. Bu, şirkətin qrafiki idi və hazırda da əməkdaşların hamısı qeyd etdiyim qrafik üzrə çalışırlar. Həftənin 5 günü 8 saat olmaqla, əməkhaqqı 450 manat qeyd olunmuşdu. Lakin aldığım əməkhaqqı 600 manat idi. Maaşın 450 manatını karta vururdular, qalan hissəsini isə nağd şəkildə verirdilər. Şirkət mənə məzuniyyətin düşmədiyini və əlavə iş saatlarına görə ödəniş edilməyəcəyini bildirir. Baxmayaraq ki, şirkətin bu davranışı qayda pozuntusudur. Hüquqları pozulmuş bir vətəndaş olaraq, məzuniyyət və əlavə günlərimin hesablanmasını tələb edirəm”.
Ən narahatedici məqam isə əlavə iş saatlarına görə ödənişin edilməməsi və əmək məzuniyyətinə icazə verilməməsidir. Cavid Əliyev hesab edir ki, 10 aylıq iş dövrü ərzində toplanmış əlavə saatlar və istifadə olunmamış məzuniyyət günləri üçün ona 3623 manat ödənilməli idi. Lakin bu tələb şirkət tərəfindən rədd olunub.
Şirkətin hüquqşünası Rafət bəy isə məsələ ilə bağlı sualımıza cavab verməkdə çətinlik çəkdiyini bildirdi:
“Bu, mənim sahəm deyil. Təbii ki, deyəcəm ki, bu, doğru deyil. Əgər hüquqları pozulubsa, Əmək Müfəttişliyi ilə əlaqə saxlasın.”
“Aral Group” 1991-ci ildə Türkiyədə yaradılıb və 2004-cü ildən Azərbaycanda fəaliyyət göstərir. Sumqayıt şəhərindəki “Bağça Şəhər” adlı iri yaşayış kompleksi də bu şirkətin layihəsidir.
Sözügedən layihə ilə bağlı da əvvəllər müxtəlif narahatlıqlar səsləndirilib. İddialara görə, binalarda yanğın təhlükəsi yüksək olan penoplast üzlüklərdən istifadə olunub. Halbuki bu material 2016-cı il mayın 19-da baş vermiş faciədən sonra rəsmi olaraq qadağan edilib.
Layihənin rəhbəri Muxtar Gülməmmədov iddiaları təkzib edib.
“Xeyr, biz buna icazə vermərik. Hər məhsulun sertifikatları var, tanınmış şirkətlə çalışırıq. Əgər belə şübhə varsa, FHN-ə şikayət etsinlər”.
Hansı tərəfin həqiqətləri danışdığını demək çətindir. Lakin dəqiqlikdə deyə bilərik ki, işçi hüquqlarının qorunması və tikinti təhlükəsizliyi məsələləri təkcə qanunlarla deyil, həm də vicdan və məsuliyyət hissi ilə tənzimlənməlidir. Əks halda, redaksiyamıza eyni mövzu ilə əlaqədar hələ çox müraciət daxil olacaq. Bu isə cəmiyyətdə həmin şirkətlərə qarşı inamsızlıq yaradır. Görünür ki, bəzi şirkətlər hələ də bu inamı qazanmaq yolunda ciddi düşünməlidirlər.(BakuPost)
Mövzunu diqqətdə saxlayacağıq.
