Ölkəmiz yeni bir inkişaf, tərəqqi və yenilənmə mərhələsinə qədəm qoyur. Artıq təkcə paytaxt Bakı deyil, Azərbaycanın bütün regionları sürətlə dəyişir, müasir dövrün çağırışlarına cavab olaraq dirçəlir. Şübhəsiz ki, bu böyük yüksəlişin arxasında Prezident İlham Əliyevin uzaqgörən siyasəti, sarsılmaz iradəsi və daim hiss olunan diqqət və qayğısı dayanır.
Regionların sosial-iqtisadi inkişafı görülən fövqəladə işlərin fonunda aydın şəkildə özünü göstərir. Prezidentin hər bir səfəri yeniliyin və quruculuğun başlanğıcı kimi tarixə həkk olunur.
Avqustun 21-də ölkə başçısının Kəlbəcərə səfəri isə xalqımız üçün təkcə növbəti addım deyil, həm də qürurverici və tarixi bir an oldu.
44 günlük şanlı Zəfər savaşından sonra Prezident İlham Əliyevin diplomatik məharəti nəticəsində imzalanmış rəzil kapitulyasiya aktı ilə düşmən tərəfindən boşaldılaraq azad olunan Kəlbəcərdə ölkə başçısını bu tarixi yurdun doğma sakinləri ilə yenidən birgə görmək əsl bayram əhval-ruhiyyəsi yaratdı. Qalib xalqın qalib liderinin Kəlbəcər şəhərinin sakinləri ilə görüşü, onlara mənzillərin açarlarını təqdim etməsi xalqımızın yaddaşında əbədi iz buraxacaq. Kəlbəcərin azad olunmasını siyasi qüdrəti ilə təmin edən Prezident İlham Əliyev bu əsrarəngiz yurd yerimizi sürətlə dirçəltmək əzmini ortaya qoyub. Ölkə başçısının iradəsi ilə bu gün təkcə Kəlbəcər yenidən qurulmur, onunla birgə sakinlərin ümidləri, doğma torpağa inamı və gələcəyə olan güvəni də bərpa olunur.
Xalqın qırılmış ümidini özünə qaytaran Prezident İlham Əliyev Kəlbəcər şəhərində 1-ci yaşayış kompleksinin ərazisində inşa olunmuş fərdi və çoxmərtəbəli evlərdə yaradılan şəraitlə tanış olduqdan sonra buraya köçən sakinlərlə görüşdü. Bu səmimi görüş zamanı səsləndirdiyi
fikirlər ölkəmizin inkişafı və işğaldan azad olunmuş torpaqların gələcəyi baxımından mühüm əhəmiyyət daşıyırdı.
Prezident İlham Əliyev çıxışı zamanı vurğuladı ki, bu gün Kəlbəcər artıq dünyanın ən gözəl mənzərəli şəhərlərindən birinə çevrilir. Dövlət başçısı sakinlərlə görüşdə həm görülən işləri dəyərləndirdi, həm də vacib anonslar verdi.
O, “Böyük Qayıdış” Proqramı çərçivəsində birinci mərhələdə Kəlbəcər şəhərində dörd yaşayış kompleksinin inşasının planlaşdırıldığını və həmin komplekslərdə 10 mindən artıq insanın yaşayacağını bildirdi.
Bununla yanaşı, Prezident İlham Əliyev Vaşinqtonda baş tutan görüşdən söz açaraq mühüm bir məqamı vurğuladı. Prezident söylədi ki, Ermənistanla sülh müqaviləsinin müəllifi də Azərbaycandır. Dövlət başçısı açıq şəkildə bəyan etdi ki, bu sənədin bəndləri hazırlanarkən Azərbaycanın mövqeyi əsas götürülüb və məhz bu mövqe bölgədə sabitliyin və davamlı sülhün bərqərar olmasında həlledici rol oynayıb.
Prezidentin sözlərinə görə bu sənədin paraflanması ilə Ermənistan-Azərbaycan qarşıdurmasına faktiki olaraq son qoyulur. Bu təkcə siyasi yox, həm də tarixi bir dönüş nöqtəsidir. Ən mühüm məqamlardan biri isə odur ki, bu razılaşma ilə Azərbaycanın ayrılmaz tərkib hissəsi olan Naxçıvanla quru bağlantı artıq reallığa çevrilir. Ölkə başçısı çıxışında daha bir mühüm məqama toxunaraq vurğuladı ki, artıq Naxçıvanla dəmir yolu əlaqəsi tam şəkildə müasirləşdiriləcək. Bununla yanaşı, Ermənistan ərazisində də yeni dəmir yolunun inşası planlaşdırılır və ən önəmlisi odur ki, Ermənistan bu öhdəliyi rəsmi olaraq öz üzərinə götürüb. Bu fakt təkcə nəqliyyat bağlantısının təmin olunması ilə yekunlaşmır. Həm də Azərbaycanın növbəti tarixi uğuru, regionda söz sahibi olan dövlət kimi mövqeyinin növbəti təsdiqidir.
Prezident İlham Əliyev çıxışında Ermənistan–Azərbaycan normallaşma prosesinin artıq başa çatdığını bəyan edərək, imzalanmış sənədlərin ölkəmizin milli maraqlarını tam şəkildə təmin etdiyini vurğuladı. Bu kontekstdə dövlət başçısı illərlə fəaliyyətsiz qalan, formal olaraq mövcudluğunu sürdürən, lakin reallıqda heç bir rol oynamayan ATƏT-in Minsk qrupunun da tarix səhnəsindən silindiyini açıq şəkildə ifadə etdi. Cənubi Qafqazda artıq oyun qaydalarını başqaları deyil, Azərbaycan müəyyən edir. Azərbaycanın siyasi iradəsi, qətiyyəti və diplomatik uğurları regionda yeni reallıqlar yaradıb və bu reallıqlar isə artıq dəyişməzdir. Nəhayət, tarix göstərdi ki, 2020-ci il noyabrın 10-da müharibənin dayandırılması düzgün və zəruri bir addım oldu və əsas məqsəd ölkəmizin suverenliyini tam şəkildə bərpa etməkdən ibarət idi. Dırnaqarası Laçın dəhlizinin aradan qaldırılması və onun Laçın–Xankəndi yoluna çevrilməsi, eləcə də Ermənistan–Azərbaycan sərhədinin Laçın istiqamətində nəzarət-buraxılış məntəqəsinin yaradılması bu məqsədə doğru atılan mühüm və tarixi addımlar sırasında yer alır.
Kəmalə Babayeva,
2 saylı Sabirabad şəhər uşaq bağçasının müdiri
