“Bakı-Qroznı” reysini yerinə yetirən təyyarənin qəzası ilə bağlı yeni təfərrüatlar məlum olub.
Bu barədə "ВЧК-ОПГУ" telegram kanalı yazıb.
Məlumata görə, təyyarənin Çeçenistanın Naurski rayonu üzərində vurulması artıq dəqiqdir: “Təyyarə eyni zamanda iki PUA-ya atəş açan hava hücumundan müdafiə sistemləri ilə vurulub. Hadisədən iki həftə əvvəl Qroznı hava limanının ərazisində iki Pantsir quraşdırılıb. Görünür, hakimiyyət nə baş verdiyini dərhal anlayıb, çünki təyyarə vurulandan bir dəqiqə sonra ”Xalça rejimi elan edildi”.
Kanal xəbər verir ki, AZAL-ın təyyarəsi dəfələrlə təyinata uyğun olaraq, hava limanına enməyə cəhd etsə də, naviqasiya sistemi bloklanıb. "ВЧК-ОПГУ" yazır:
“Çünki bu anda hava məkanında elektron döyüş texnikası işləyirdi. Təyyarə problemi anlayıb Bakıya əks istiqamətdə hərəkət edən zaman isə Çeçenistan səmasında fövqəladə hadisə baş verdi, yəni vuruldu”.
Telegram kanalının müəyyən etdiyi kimi, həmin gün səhər Çeçenistan səmasında ümumilikdə üç pilotsuz təyyarə vurulub:
“PUA uçuşlarının biri Visaitovski rayonunda, digər ikisi isə Naurski rayonunda qeydə alınıb. Daha dəqiq desək, Nikolaevski kəndi üzərində. Təyyarə məhz orada vurulub. Vurulma zamanı təyyarənin ekipajı əvvəlcə hadisəni quş vurması ilə səhv salıb. Təyyarənin ekipajı ilə dispetçer arasındakı danışıqların stenoqramından göründüyü kimi, “quş zərbəsi” kimi anlaşılan hadisə saat 08.16-da baş verib. 1 dəqiqə sonra isə saat 08.17-də bütün mülki təyyarələrin təhlükə zonasını tərk etməli olduğu “Xalça” planı ilə bağlı fövqəladə vəziyyət tətbiq edilib. Göründüyü kimi, elektron müharibə və hava hücumundan müdafiənin "uğurlu" istifadəsindən dərhal sonra vəziyyətin nə olduğu anlaşılıb”.
Məlumatda qeyd olunur ki, bu fövqəladə vəziyyətlə bağlı təyyarə heç bir xəbərdarlıq almayıb:
“Qaydaya əsasən, dispetçer mülki tezlikdə “Xalça” planı haqqında uçuş heyətinə məlumat verməlidir, lakin danışıqların stenoqramından belə görünür ki, heç bir xəbərdarlıq olmayıb. Həmin gün növbədə olan uçuş direktoru iddia edir ki, onun “Xalça” planının tətbiqi barədə həmin an məlumatı olmayıb. Hansı ki, əsas məsuliyyətli şəxs o idi. O, bu barədə yalnız səhər saat 08.21-də hərbçilərdən xəbər tutub. Həmin vaxt isə vurulan təyyarənin ekipajı artıq “quş vurmasından” sonra yaranan problemlər barədə dispetçerə məlumat vermişdi. Ekipaj hətta alternativ aerodrom haqqında məlumat tələb etmişdi. Lakin tələb cavabsız qalıb”.
Lent.az
