1xeber.media xəbər verir ki, Rusiya Xarici İşlər Nazirliyinin rəsmi nümayəndəsi Mariya Zaxarova Almaniyanın xarici işlər naziri İohann Vadefulun Rusiyaya dair açıqlamalarını tənqid edərək onun düşünmə qabiliyyətini şübhə altına alıb.
Zaxarova bu barədə “Sputnik” radiosunun efirində danışıb. O, Almaniya XİN rəhbərinin Varşavada keçirilən konfransda Rusiyanın dəyərlərinin olmadığını və Qərbi Avropada nüfuzunu genişləndirməyə çalışdığını bildirməsinə münasibət bildirib.
Rusiya diplomatı belə fikirlərin yüksək dövlət vəzifəsi tutan şəxslər tərəfindən səsləndirilməsini anlaşılmaz hesab etdiyini deyib. O, Rusiyanın tarix boyu dəfələrlə məhv edilməyə cəhd göstərilməsinə baxmayaraq, yenidən gücləndiyini iddia edib.
Zaxarova daha əvvəl də Varşavada Rusiyanın mümkün hücumuna qarşı NATO ölkələrinin müdafiə planının təqdim edilməsini sərt tənqid etmişdi.
Qeyd edək ki, tərəflərin açıqlamaları Rusiya ilə Avropa ölkələri arasında təhlükəsizlik və siyasi münasibətlər ətrafında davam edən fikir ayrılıqlarını əks etdirir. Zaxarovanın fikirləri Moskvanın mövqeyini ifadə edir.
