1xeber.media xəbər verir ki, Ermənistanın xarici işlər naziri Ararat Mirzoyan Azərbaycanla davam edən münaqişə və qonşu ölkələrlə həll olunmamış problemlərin Ermənistanın Avropa İttifaqına (Aİ) üzvlük perspektivinə mənfi təsir göstərə biləcəyini bildirib.
Nazir bu barədə Varşava Təhlükəsizlik Forumunda çıxışı zamanı danışıb. O qeyd edib ki, Ermənistanın Aİ-yə üzvlük prosesi hələ ilkin mərhələdədir və yekunda ölkənin quruma qəbul edilib-edilməyəcəyi bəlli deyil.
Mirzoyanın sözlərinə görə, Ermənistan parlamenti 2025-ci ilin yazında Aİ-yə üzvlük prosesinin başlanması ilə bağlı qanun qəbul etsə də, məsələ ətrafında geniş ictimai müzakirələrə yenicə başlanılıb.
Nazir Azərbaycanın Ermənistan üçün əsas qonşulardan biri olduğunu vurğulayaraq iki ölkənin sülh sazişini parafladığını, ikitərəfli ticarətə başladığını və regional kommunikasiyaların açılması istiqamətində addımlar atdığını bildirib. Bununla yanaşı, həllini gözləyən həssas məsələlərin qaldığını da qeyd edib.
Ermənistanın Türkiyə ilə münasibətləri normallaşdırmağa çalışdığını, lakin sərhədin hələ də bağlı olduğunu deyən Mirzoyan İran, Gürcüstan və Rusiya ilə münasibətlərin də İrəvanın xarici siyasətində mühüm yer tutduğunu vurğulayıb.
O əlavə edib ki, Ermənistan Aİ-nin tamhüquqlu üzvü olmaq istəyirsə, qonşu ölkələrlə problemlərin və münaqişələrin mövcudluğu bu məqsədə çatmağı çətinləşdirə bilər.
Qeyd edək ki, Mirzoyanın açıqlaması Ermənistanın Avropaya inteqrasiya planlarının regional münasibətlərlə əlaqəsini gündəmə gətirir. Bununla belə, Ermənistanın Aİ-yə üzvlüyü ilə bağlı yekun qərar qəbul edilməyib və prosesin nəticəsi bir sıra siyasi və hüquqi şərtlərdən asılıdır.
