Avropa Aviasiya Təhlükəsizliyi Agentliyi (EASA) "Azərbaycan Hava Yolları"na (AZAL) məxsus sərnişin təyyarəsinin Çeçenistanda (Rusiya) vurulmasından sonra Moskva, Sankt-Peterburq, Yekaterinburq, Doni Rostov və Samara daxil olmaqla Rusiyanın beş şəhərinə uçuşları dayandırmağa çağırıb.
1xeber.media xəbər verir ki, beynəlxalq qurum öz tövsiyəsini Rusiyanın Ukraynaya qarşı davam edən müharibəsi ilə əsaslandırıb.
“Bu, hakimiyyətlə hərbçilər arasında zəif koordinasiya, eləcə də yanlış identifikasiya səbəbindən Rusiya səmasında mülki təyyarələrə təsadüfi hücumlar riski yaradır. Xüsusilə, Ukrayna raketləri və dronlarının ölkənin dərinliklərinə buraxılmasına cavab olaraq istifadə edilən Rusiyanın hava hücumundan müdafiə sistemi tərəfindən təhlükə yaranır”, - agentlik qeyd edib.
Hazırda heç bir Avropa İttifaqı hava yolları şirkəti Rusiyaya və ya Rusiya üzərindən uçuşlar həyata keçirmədiyi üçün EASA-nın bu çağırışı müharibə ilə bağlı risklərə baxmayaraq, bunu davam etdirən üçüncü ölkə daşıyıcılarına şamil olunur.
Bildirilir ki, artıq 7 xarici aviaşirkət təhlükəsizlik şəraitindən asılı olaraq, Rusiyaya uçuşları qismən ləğv etmək qərarına gəlib. Həmin qurumlar arasında Qazaxıstan, İsrail, Birləşmiş Ərəb Əmirlikləri, Səudiyyə Ərəbistanı, Serbiya, Özbəkistan və Türkmənistanın aviaşirkətləri var.
Xatırladaq ki, Bakı-Qorznı marşrutu ilə uçan AZAL-a məxsus sərnişin təyyarəsi ötən il dekabrın 25-də Çeçenistanda Rusiyanın hava hücumundan müdafiə sisteminin hücumuna məruz qalıb. Bundan sonra uçuş istiqaməti dəyişdirilən təyyarə Qazaxıstanın Aktau şəhərində yerə çırpılıb. Olay nəticəsində 38 nəfər həlak olub, 29 nəfər yaralanıb.
Teleqraf.com
