Azərbaycanın dövlət siyasətində vətəndaş amili və onun sosial rifahı prioritet məsələdir.
Son illər Prezident İlham Əliyevin rəhbərliyi ilə ölkədə vətəndaşların sosial rifahının gücləndirilməsi sahəsində görülən davamlı tədbirlər bunun bariz nümunəsidir. İndiyədək dörd böyük sosial islahat həyata keçirilib və onun müsbət nəticələri bütün həssas qrupların həyatında hiss olunur.
1xeber.media xəbər verir ki, bunu Sosial-İqtisadi və Kənd Təsərrüfatının İnkişafına Dəstək İctimai Birliyinin sədri Zülfiyyə Nuriyeva Prezident İlham Əliyevin televiziya kanallarına verdiyi müsahibəni şərh edərkən deyib.
O, fikrinə davam edərək bildirib: “Əməkhaqqı, pensiyalar və müavinətlər bir neçə dəfə artırılıb. Bu artımın rəqəmlərlə ifadəsi reallığı daha dolğun əks etdirir. Təkcə son illər xərclənən vəsait sosial sahəyə dövlət qayışının miqyasını göstərir. Televiziya jurnalistlərinin suallarını cavablandırarkən Prezident dedi ki, bu il yanvarın birindən minimum əməkhaqqı 55 manat artıb və 400 manata çatıb. Minimum pensiya 40 manat artıb və 320 manata çatıb. Dövlətimizin başçısı son bir neçə il ərzində dörd sosial paketin həyata keçirildiyini və bu məqsədlər üçün 7 milyard manatdan çox vəsait xərcləndiyini diqqətə çatdırdı”.
Müsahibimiz daha sonra deyib: “Sosial siyasətin məntiqi davamı isə Prezident İlham Əliyevin ötən il dekabrın 23-də imzaladığı “Əhalinin sosial rifahının yaxşılaşdırılması sahəsində tədbirlərin davam etdirilməsi haqqında” Sərəncam oldu. Həmin Sərəncam sosial sahədə əhalinin bütün təbəqələrinin rifahını yaxşılaşdırmağı nəzərdə tutur. Sayca beşinci olan sosial islahat paketi kifayət qədər əhatəli və maliyyə tutumludur. Belə ki, onun maliyyə tutumu əlavə olaraq 1,4 milyard manat vəsaiti özündə ehtiva edir. Yeni Sərəncama əsasən bu ildən ölkəmizdə minimum aylıq əməkhaqqının məbləği 16 faiz artırılıb. Bu rəqəm təkcə minimum əməkhaqqını ehtiva etmir. Belə ki, müxtəlif dövlət qurumları əhatə edən sahələr (sosial, elm, təhsil, səhiyyə, mədəniyyət, gənclər, idman, kənd təsərrüfatı, ekologiya, ətraf mühitin mühafizəsi, mənzil-kommunal, nəqliyyat, rabitə, meliorasiya, su təsərrüfatı və s.) üzrə 19 pillədən ibarət Vahid Tarif Cədvəlinin ilk pilləsindəki maaş 400 manata çatdırılacaq, digər pillələr üzrə maaşlarda da buna uyğun artımlar tətbiq ediləcək. Yəni minimum əməkhaqqındakı artım xüsusən də dövlət qurumlarında çalışan bütün şəxsləri əhatə etməsi kifayət qədər vacib bir məqamdır. Ayrı-ayrı sosial təbəqələrin rifah halının yaxşılaşmasına yönəldilən bu addım, şübhəsiz ki, cəmiyyətdə razılıqla qarşılanıb və onların həyat səviyyəsinin yaxşılaşmasına xidmət edir”.
