Azərbaycanın siyasət, mədəniyyət, ədəbiyyat, idman, ictimai, hərbi, media və digər sahələrində ad və soyadları eyni olan bir çox tanınmış simalar var. Bəzən onlar haqqında hər hansı məlumat veriləndə kimlərsə bu adaşları ayıra bilmir, qarışıq salır, yalnız şəkillərinə baxandan sonra söhbətin kimdən getdiyini ayırd edə bilirlər.
Tanınmış adaşları bəzən hətta media da səhv salır: hansısa saytda xəbər dərc olunur, diqqətsizlik üzündən yazı və onunla birlikdə təqdim edilən şəkildə hər iki adaş görünür. Bir sözlə, adaşlar jurnalistləri də çaşdırır.
1xeber.media xəbər verir ki Modern.az saytı çoxdandır ara verdiyi “Tanınmış adaşlar” rubrikasını yenidən davam etdirir.
Rubrikamızın budəfəki yazısında Samir Şərifovlardan bəhs edəcəyik.
Bu ad-soyadı daşıyan tanınmış məmur hazırda sosial şəbəkələrdə müzakirə olunur. Müzakirələrə səbəb 19 ildir maliyyə naziri işləyən Samir Şərifovun həmin vəzifədən azad edilməsi və Baş nazirin müavini postuna aparılmasıdır.
Bu gün sosial şəbəkələrdə “Samir Şərifov vəzifəsindən azad olundu” sözləriniə rast gələndə, yəqin ki, bəzilərində istər-istəməz sual yarandı: hansı Samir Şərifov? Axı geniş ictimaiyyət eyni ad-soyadda iki yüksək çinli məmur tanıyır...
Maraqlıdır ki, onların hər ikisinin də tərcümeyi-halında Xarici İşlər Nazirliyi sistemində çalışdıqlarına dair qeydlər var.
Baş nazirin 64 yaşlı yeni müavini Samir Şərifov 19 il idi ki, eyni vazifədə - maliyyə naziri postunda çalışırdı.
1983-1991-ci illərdə keçmiş SSRİ-nin xarici iqtisadi əlaqələr sistemində Bakıda və xaricdə (Yəmən Xalq Demokratik Respublikası) iqtisadçı, 1991-1995-ci illərdə Azərbaycan Respublikasının Xarici İşlər Nazirliyinin Beynəlxalq İqtisadi Əlaqələr İdarəsində şöbə müdiri, idarə rəisinin müavini işləyib.
1995-2001-ci illərdə Azərbaycan Respublikası Milli Bankında Departament direktoru, baş direktor vəzifələrini tutub.
2001-2006-cı illərdə Azərbaycan Respublikası Dövlət Neft Fondunun icraçı direktoru vəzifəsində işləyib. Eyni zamanda 2003-2006-cı illərdə Mineral Ehtiyatların Hasilatı ilə Məşğul olan Sənaye Sahələrində Şəffaflıq Təşəbbüsü üzrə Hökumət Komissiyasının sədri olub.
Samir Şərifov 2006-cı il aprelin 18-də Azərbaycan Respublikasının maliyyə naziri təyin olunub.
Bu gündən isə yeni vəzifəsində - Baş nazirin müavini postunda çalışacaq.
Digər Samir Şərifov adaşı ilə müqayisədə bir qədər cavandır – 49 yaşı var.
Hazırda xarici işlər nazirinin müavini vəzifəsində çalışır.
Beynəlxalq hüquq üzrə bakalavr və magistr təhsili alıb, aspiranturda oxuyub.
2000-ci ildən diplomatiya sahəsində işləməyə başlayıb. Dörd il Xarici İşlər Nazirliyinin (XİN) Beynəlxalq hüquq və müqavilələr idarəsində, üç il Azərbaycan Respublikasının Avropa Şurası yanında Daimi Nümayəndəliyində çalışıb.
2007-2009-cü illərdə yenidən XİN-in Beynəlxalq hüquq və müqavilələr idarəsində işləyib.
2009-2014-cü illərdə Azərbaycan Respublikasının BMT yanında Daimi Nümayəndəliyinin birinci katib və müşaviri vəzifələrini tutub.
2014-2018-ci illərdə Xarici İşlər Nazirliyinin Beynəlxalq hüquq və müqavilələr idarəsində rəis müavini, 2018-2021-ci illərdə Azərbaycan Respublikasının Rusiya Federasiyasındakı Səfirliyinin müşavir-elçisi vəzifəsində çalışıb.
2021-2023-cü illərdə Xarici İşlər Nazirliyinin Beynəlxalq hüquq və müqavilələr idarəsinin rəisi vəzifəsində çalışıb.
8 iyul 2023-cü il tarixində ona “ikinci dərəcəli fövqəladə və səlahiyyətli elçi” diplomatik rütbəsi verilib. 8 sentyabr 2023-cü il tarixli sərəncamla isə xarici işlər nazirinin müavini təyin olunub.
