Azərbaycan Prezidenti İlham Əliyev bu il Naxçıvan və Ordubad şəhərlərinin Baş planlarının hazırlanmasına start veriləcəyini açıqlayıb. Dövlət başçısı Qarabağ və Şərqi Zəngəzurdakı bütün yaşayış məntəqələrinin vahid Baş plan əsasında qurulduğunu bildirib.
Prezident Naxçıvan, Qarabağ və Şərqi Zəngəzurun iqtisadi, sosial, yaşıl enerji və təhlükəsizlik nöqteyi-nəzərdən vahid bir böyük məkana çevrilməli olduğunu qeyd edib.
Bu açıqlama Naxçıvanın adıçəkilən iki regionla birləşdiriləcəyi kimi dəyərləndirilib.
Bakı bu istiqamətdə hansı addımları atacaq? Üç regionun vahid məkana çevrilməsi üçün Ermənistanın yurisdiksiyasındakı tarixi Azərbaycan torpaqları nəzarətə götürülə bilərmi? Bu istiqamətdə İrəvanla hər hansı razılaşmanın olması mümkündür?
Globalinfo.az-a danışan deputat Hikmət Babaoğlu deyib ki, Azərbaycan inkişaf etdikcə şəhərsalma arxitekturasının təkmilləşdirilməsi zərurəti yaranır:
“Torpaqlarımız işğaldan azad edildikdən sonra böyük qayıdış yeni planlaşdırma əsasında aparılır. İşğal altında qalan, dağıdılan kənd və şəhərlərdə bu nümunə təşkil edir. Urbanizasiya kimi məsələlər şəhər arxitekturası infrastrukturunun köklü dəyişikliyini zəruri edirdi. Yeni şərtlər Naxçıvan və Ordubadın şəhərsalma planında yeni yanaşma tələb edir. Nəticə etibarilə bu, bir sıra səbəblərlə əlaqədardır.
Qardaş Türkiyə ilə Naxçıvan arasında inteqrasiya, iqtisadi əlaqələr yeni mərhələyə qədəm qoyur. Bakı-Tbilisi-Qars yolu ilə çəkilən dəmiryolu Naxçıvana qədər uzaqdılacaq. Eyni zamanda Türkiyədən Naxçıvana qaz kəməri çəkiləcək. Bütün bunlar yeni reallıqlar yaradır”.
Deputat bildirib ki, Naxçıvanın Şərqi Zəngəzur və Qarabağla birləşdirilməsi dedikdə, burada birləşmə sözünün hansı mənada işlədildiyinə baxmaq gərəkdir:
“Hesab edirəm ki, Qərbi Zəngəzur Ermənistanın ərazisi hesab olunduğu üçün regional birləşmədən danışmaq çox tezdir. Azərbaycan Prezidentinin bəhs etdiyi birləşmə kommunikasiyaların açılması, dəmiryolu, həmçinin enerji layihələrin icrası mənasındadır”.
