Bu gün Azərbaycanın azadlığı və müstəqilliyi uğrunda mübarizənin simvoluna çevrilmiş 20 Yanvar faciəsindən 35 il ötür. Bu gündə Azərbaycan xalqı öz azadlığı və müstəqilliyi uğrunda ilk şəhidlərini verib, azadlığa gedən yolda həyatlarını qurban verən Vətən övladları misilsiz fədakarlıqları ilə xalqımızın qəhrəmanlıq salnaməsinə yeni parlaq səhifə yazıblar.
1xeber.media xəbər verir ki yanvarın 20-də Lənkəran Şəhər İcra Hakimiyyətində (ŞİH) 20 Yanvar şəhidlərinin ailə üzvləri ilə görüş keçirilib. Lənkəran Şəhər İcra Hakimiyyətinin (ŞİH) başçısı Taleh Qaraşov bildirib ki, Ulu Öndərin təşəbbüsü ilə 20 Yanvar faciəsinə ilk dəfə hüquqi-siyasi qiymət verilib və cənab Prezident İlham Əliyevin müvafiq sərəncamları ilə 20 Yanvar şəhid ailələrinə və əlillərinə dövlət qayğısının artdığını, onların maddi-məişət şəraitinin, iş və mənzillə təminatının daim yaxşılaşdırıldığını vurğulayıb. İcra başçısı şəhid ailələri və müharibə əlillərinin qayğıları ilə maraqlanıb, onlara maddi yardım göstərilib.
Görüş sonrası Lənkərandan olan milli qəhrəmanların abidələri ziyarət olunub.
Daha sonra Ümümxalq Hüzn Günü ilə bağlı şəhər İcra hakimiyyətinin başçısı Taleh Qaraşov, icra hakimiyyəti aparatının məsul işçiləri, rayonun hüquq mühafizə orqanlarının, idarə və müəssisələrin rəhbərləri və ictimaiyyətin nümayəndələri Şəhidlər Abidə Kompleksini ziyarət ediblər, abidə önünə və şəhid məzarlarına tər güllər düzüblər, şəhidlərimiz ehtiramla yad olunub.
Daha sonra tədbir iştirakçıları Lənkəran Dövlət Dram Teatrında 20 Yanvar şəhidlərinin xatirəsinə həsr olunan bədii-kompozisiyaya tamaşa ediblər.
Qeyd edək ki, Ümumxalq Hüzn Günü ilə əlaqədar rayon ərazisində mədəniyyət, təhsil, səhiyyə və digər qurumlarda silsilə tədbirlər, kitab və rəsm sərgiləri keçirilib, 20 Yanvar şəhidlərinin qəhrəmanlıqları səhnələşdirilərək tamaşalar nümayiş etdirilib. Şəhidlər Abidə Kompleksi gün ərzində ictimaiyyət nümayəndələri tərəfindən ziyarət edilib.
Saat 12:00-da rayon ərazisində şəhidlərin xatirəsi bir dəqiqəlik sükutla yad olunub, nəqliyyatın hərəkəti dayanıb, maşınlardan səs siqnalları verilib.
Allah rəhmət eləsin!
