Gürcüstan parlamentinin Özünüidarəetmə və Regional Siyasət Komitəsinin sədri İrakli Kadaqişvili Azərbaycan Prezidenti İlham Əliyevin geosiyasi yanaşmalarla bağlı son bəyanatlarını yüksək qiymətləndirib.
O, 1xeber.media Gürcüstan bürosuna açıqlamasında bildirib ki, Azərbaycan Prezidentinin mövqeyi tam vaxtında və olduqca dəqiq şəkildə regional həqiqətləri ortaya qoyur.
“Bəzi Avropa İttifaqı nümayəndələrinin Asiya ölkələri ilə münasibətləri fonunda bu həqiqətləri görməzdən gəlmələri isə təəssüf doğurur”, - deyə Kadaqişvili vurğulayıb.
Deputat qeyd edib ki, Gürcüstan hər zaman Cənubi Qafqazda sülh və əməkdaşlığın tərəfdarı olub: “Lakin bəzi qüvvələrin Qafqaz ölkələri arasında inamsızlıq toxumu səpməsi yolverilməzdir. Bu səbəbdən də bir daha vurğulamaq lazımdır ki, cənab İlham Əliyevin mövqeyi reallığa əsaslanır".
İ.Kadaqişvili qeyd edib ki, Gürcüstan və Azərbaycan bu məsələdə tam koordinasiyalı və yaxın mövqedədirlər. Onun fikrincə, Prezident Əliyevin bəyanatı, həmçinin Avropa İttifaqına da bir mesajdır: “Geosiyasəti və coğrafiyanı dəyişmək olmaz. Coğrafiya göstərir ki, Xəzər dənizi ilə Qara dəniz arasındakı yol yalnız Azərbaycan və Gürcüstan üzərindən keçir”.
Gürcü siyasətçi Azərbaycanın Çin və digər Asiya ölkələri ilə əməkdaşlığa hazır olduğunu, bu əməkdaşlığın yalnız sülh və inkişaf şəraitində mümkün olacağını vurğulayıb: “Bu marşrut – Xəzərdən Qara dənizə qədər uzanan yol – sülh, inkişaf və rifah naminə hər kəs tərəfindən istifadə olunmalıdır. Bu yanaşmanı Avropa İttifaqı liderləri də düzgün başa düşməlidirlər”.
İkitərəfli münasibətlərə də toxunan Kadaqişvili əlavə edib ki, Gürcüstan və Azərbaycan arasında strateji tərəfdaşlığa əsaslanan sıx münasibətlər mövcuddur: “Biz birgə səylərlə, xüsusilə, Prezident İlham Əliyevin son bəyanatında qaldırılan məsələlərin inkişafına və müdafiəsinə çalışırıq”.
İrakli Kadaqişvili vurğulayıb ki, Gürcüstan Azərbaycanın Ermənistanla sülhə nail olmasını arzulayır və Cənubi Qafqazın üç dövləti arasında əməkdaşlıq mühitinin formalaşmasına dəstək verir.
Qeyd edək ki, Prezident İlham Əliyev aprelin 9-da ADA Universitetində "Yeni dünya nizamına doğru" mövzusunda beynəlxalq forumda Aİ-nin Gürcüstanın daxili məsələlərinə müdaxilə cəhdlərinin müstəmləkəçi yanaşmanın təzahürü olduğunu və qəbuledilməz olduğunu deyib.
“Avropa Komissiyasının Gürcüstanın daxil işləri ilə bağlı proseslərə münasibəti isə qətiyyən qəbuledilməzdir. Bu, müstəmləkəçilərin davranışıdır. Onlar gürcü xalqının iradəsinə özlərinin müstəmləkəçi keçmişinin prizmasından yanaşırlar. Bu, tamamilə qəbuledilməzdir. Gürcü xalqı bilir ki, biz onlarla birlikdəyik və Gürcüstan hökuməti də bunu bilir. Gürcüstanın bütün daxili işləri Brüsseldəki bürokratlar deyil, gürcü xalqı tərəfindən həll edilməlidir. Beləliklə, biz Azərbaycan ilə Gürcüstan arasında tərəfdaşlığı gücləndirməliyik”, - Prezident vurğulayıb.
