İran hökuməti Trampa məsləhət verib

1xeber.media xəbər verir ki,İranın strateji məsələlər üzrə vitse-prezidenti Cavad Zərif bildirib ki, ABŞ-ın yeni seçilmiş prezidenti Donald Tramp Ağ Evdəki ilk müddətində yürütdüyü İran siyasətindən əl çəkməlidir. Bu barədə “İnterfaks” xəbər verir.

Onun sözlərinə görə, bu, Trampın 2016-cı il seçkilərində qalib gəldikdən sonra həyata keçirməyə başladığı İrana qarşı “maksimum” təzyiq siyasətinə aiddir. Zərif əlavə edib ki, bu qəbildən olan hərəkətlər Tehranı uranın zənginləşdirilməsini intensivləşdirməyə gətirib çıxarıb.

Bir gün əvvəl “The Wall Street Journal” (WSJ) mənbələrə istinadən yazıb ki, Tramp vəzifəyə gəldikdən sonra İrana, xüsusən də neft sənayesinə qarşı sanksiyaları kəskin şəkildə sərtləşdirəcək.

Nəşr xatırladıb ki, Tramp prezident kimi ilk dövründə Tehranla iqtisadi sanksiyaların ləğvi müqabilində Tehranın nüvə proqramını məhdudlaşdırmaq məqsədi daşıyan Birgə Hərtərəfli Fəaliyyət Planı kimi tanınan altı dövlətin iştirak etdiyi sazişdən necə çıxmışdı.

Qəzetin Ağ Evdəki mənbələri Trampın İranla bağlı siyasətini davam etdirəcəyinə inanırlar.