1xeber.media xəbər verir ki.TV Musavat Milli Qəhrəman Hökumə Əliyevanın ata ocağından xüsusi reportaj hazırlayıb. Əməkdaşlarımız Hökumə Əliyevanın yaxınları ilə görüşərək onların fikirlərini öyrəniblər.
Hökumə Əliyevanın Prezident İlham Əliyevin 29 dekabr 2024-cü il tarixli sərəncamı ilə Milli Qəhrəman adına layiq görülməsi, ailəsində və onu tanıyan hər kəsdə dərin qürur hissi yaradıb. Amma onun bu böyük ada ölümündən sonra yüksəlməsi yaxınlarında həm də böyük kədər hissi ilə doğurub .
25 dekabrda Bakıdan Qroznıya uçan təyyarənin Rusiya tərəfindən vurulması nəticəsində baş verən faciədə, Hökumə Əliyevanın və ekipaj üzvlərinin göstərdiyi cəsarət, peşəkarlıq və fədakarlıq 29 sərnişinin həyatını xilas etdi. Onun qəza zamanı dediyi “Hər şey yaxşı olacaq” ifadəsi, həm sosial şəbəkələrdə, həm də media məkanında hələ də əks-səda yaratmaqdadır. Bu ifadə faciənin simvoluna çevrilərək, xalqın qəlbində dərin iz buraxıb. Heç bir şans olmadığı halda, hər şey 29 can üçün doğrudan da yaxşı oldu...
Hökumə Əliyevanın yaxınları onun haqqında danışarkən göz yaşlarına boğulsalar da, qürur hissini gizlətməyiblər. Onlar Milli Qəhrəmanımızın həyatını riskə ataraq başqalarının həyatını necə xilas etdiyini minnətdarlıqla vurğulayıblar.
Allah Milli Qəhrəmanımız Hökumə Əliyevaya rəhmət eləsin!
