Süni intellekt avadanlıqları bazarı xüsusi çiplərə, sürətləndiricilərə və "edge computing" cihazlarına artan tələbat sayəsində sürətlə böyüyür.
1xeber.media xəbər verir ki, bu sektora istiqamət verən 10 aparıcı şirkət açıqlanıb. Həmin siyahını təqdim edirik:
1. Nvidia - AI donanım bazarının lideridir. GPU-ları müasir süni intellektin əsasını təşkil edir və dərin öyrənmə, maşın öyrənməsi və sürətləndirilmiş hesablama sahələrində geniş tətbiq olunur. "CUDA" platforması isə sənaye standartına çevrilib.
2. AMD - "Nvidia"nın əsas rəqibi olan AMD, "Instinct" sürətləndiriciləri və açıq proqram təminatı platforması ilə bazarda güclü mövqeyə sahibdir. Şirkət yüksək performanslı hesablama və AI tətbiqləri üçün rəqabətcil həllər təqdim edir.
3. Intel - Ənənəvi CPU liderliyindən çoxməqsədli "xPU" strategiyasına keçir. CPU, GPU və digər sürətləndiriciləri birləşdirərək yüksək performanslı hesablama və AI işləri üçün geniş donanım portfeli təklif edir.
4. Meta - Öz infrastrukturunu gücləndirmək üçün "MTIA" adlı xüsusi AI sürətləndiricisini inkişaf etdirib. Çip şirkətin sosial media platformalarında və digər xidmətlərində böyük miqyaslı AI tətbiqlərinə dəstək verir.
5. Qualcomm - "Edge AI" yanaşmasına fokuslanır. Məlumatların cihaz üzərində emalını təmin edərək daha az gecikmə və yüksək məxfilik təklif edir. Bu həllər smartfonlardan tutmuş IoT cihazlarına qədər geniş tətbiq sahəsinə malikdir.
6. Google - Tədqiqat və bulud xidmətlərində özünün "Tensor processing unit" (TPU) çiplərindən istifadə edir. TPU-lar maşın öyrənməsi iş yükünə uyğunlaşdırılıb və "Google"un AI sahəsindəki mövqeyini gücləndirir.
7. Amazon - "Trainium" (AI təlimi üçün) və "Inferentia" (çıxarımı sürətləndirmək üçün) adlı xüsusi çiplər istehsal edir. Bu həllər "AWS" istifadəçilərinə həm qənaətli, həm də yüksək performanslı xidmətlər təqdim edir.
8. Groq - Aşağı gecikməli süni intellekt çıxarımı üçün "Dil emalı vahidi" (LPU) memarlığını inkişaf etdirib. Bu texnologiya böyük dil modellərinin daha sürətli və real vaxt tətbiqlərində daha səmərəli işləməsinə imkan yaradır.
9. Microsoft - Bulud xidmətləri üçün xüsusi AI sürətləndiriciləri hazırlayır. "Azure Maia AI Accelerator" və "Azure Cobalt CPU" şirkətin "Azure" platformasında AI iş yükünü daha səmərəli idarə etməyə yönəlib.
10. Cerebras - Şirkət nəhəng miqyaslı "wafer" prosessorları ilə fərqlənir. Bu çiplər mürəkkəb AI modellərinin sürətləndirilməsi üçün xüsusi hazırlanıb və ənənəvi prosessorlardan daha güclü imkanlar təqdim edir.
