Əlişir Nəvai adına Özbəkistan Dövlət Universitetinin fəxri professoru, iş insanı, “VİP Milan Hospital”ın təsisçi direktoru Xuraman Muradova Zəfərimizin memarı, Müzəffər Ali Baş Komandan İlham Əliyevin xalq üçün yaşanmış ömür yoluna həsr etdiyi 2 kitabını – “Əsrin qəhrəmanı olan komandan” və “Əsrə bərabər 20 il” kitablarını Prezident Kitabxanasına, Azərbaycan Respublikası Milli Kitabxanasına və geniş oxucu auditoriyasına təqdim edib.
1xeber.media xəbər verir ki, “Elm və Təhsil” nəşriyyatında yüksək nəfis tərtibatda çap olunan kitabın redaktoru Xalq yazıçısı Çingiz Abdullayev, rəyçisi Xalq yazıçısı Natiq Rəsulzadədir. Kitabda Ali Baş Komandanın Ordumuza sərkərdəliyinə, ölkəmizə rəhbərliyinə, prezidentlik fəaliyyətinə işıq salan, dəqiq faktlara söykənən bir-birindən maraqlı məqalə və müsahibələr yer alıb.
Kitab 11 fəsildən ibarətdir. Kitabın müqəddiməsi Xuraman Muradovanın Müzəffər Ali Baş Komandana həsr etdiyi "Əsrin Qəhrəmanı olan Komandan” şeiri ilə başlayır:
Yaşatdı xalqına böyük bir Zəfər,
Zülmlərə qılınc çalan Komandan!
Ürəyi dağ boyda, ruhu göy qədər,
Könüllərə məlhəm olan Komandan!
Ata vəsiyyəti hasilə yetdi,
Ulu Öndərimin ruhun şad etdi,
Dar gündə xalqına imdada yetdi,
Əsrin Qəhrəmanı olan Komandan!
Nəşrin “Müzəffər Ali Baş Komandan İlham Əliyev Azərbaycan Ordusunun “Dəmir Yumruq”lu qürur simvoludur!” , “Uca Rəbbim müzəffər xalqımızın müzəffər oğlunu qorusun!” adlı fəsilləri Prezidentimizin, “Tarix yazan Sərkərdənin arxasında dayanan qeyrətli Türk Xatunu” fəsli isə Ali Baş Komandanla ən çətin yollarda çiyin-çiyinə addımlayan birinci xanım Mehriban Əliyevanın parlaq fəaliyyətindən bəhs edir. “Azərbaycanın birinci xanımı, əzizimiz, ölkəmizdə xeyriyyəçiliyin simvoluna çevrilən Mehriban xanım Əliyevanın xeyirxahlıq yolunu mən həmişə böyük rəğbət hissi ilə dəstəkləmiş və ürəkdən alqışlamışam...”, “Xilaskarı dəstəkləmək milləti dəstəkləmək deməkdir!” başlıqlı fəsillərdə müəllifin dövlətçiliyimizə dair parlaq fikirləri əksini tapıb.
Kitabda yer alan “Ürəklərdə ölümsüzləşən Öndər Şəxsiyyət” adlı məqaləsini müəllif Ulu Öndər Heydər Əliyevin unudulmaz xatirəsinə, “Türk dünyamıza müzəffər Oğul bəxş edən Ana” məqaləsini isə bu məmləkət üçün İlham Əliyev böyüklüyündə şəxsiyyət yetişdirən müqəddəs Ana, görkəmli həkim, akademik Zərifə xanım Əliyevanın əziz xatirəsinə həsr edib.
“Biz hamımız möhtərəm Ali Baş Komandanımız İlham Əliyevin əsgərləriyik!” məqaləsində müəllif müəllimindən həkiminə, alimindən memarına qədər bütün xalqımızın “Dəmir yumruq” ətrafında sıx birləşməsindən qürur hissi ilə söhbət açır. “Azərbaycan-Türkiyə Cümhurbaşqanlarının qardaşlığı Turanın ayaq səsləridir” adlı yazıda Xuraman Muradova Prezident İlham Əliyevlə Rəcəb Tayyib Ərdoğanın sıx dostluq, qardaşlıq, əməkdaşlıq münasibətlərindən bəhs edir, Qarabağ Zəfərinin, Şuşa Bəyannaməsinin bu qardaşlığın zirvəsi olduğunu vurğulayır.
Əsər geniş oxucu kütləsi üçün nəzərdə tutulub və yüksək nəfis tərtibatda çap olunub. Kitabın müəllifi Xuraman Muradova uzun illərdir gənclərimizin ali təhsil almaları, müxtəlif xəstəliklərdən əziyyət çəkən körpələrimizin müalicə olunmaları, xüsusilə də rəhbərlik etdiyi “Vip Milan” Hospitalda şəhid ailələrinin və qazilərimizin sağlamlığı istiqamətində böyük ürəklə çalışan, vətəndaş borcunu layiqincə yerinə yetirən ziyalı, xeyir əməllər sahibidir. İşgüzar fəaliyyətləri ilə bərabər, X.Muradova həm də ədəbi yaradıcılıqla məşğuldur. O, Azərbaycan Yazıçılar Birliyinin və Türkiyə Yazarlar Birliyinin üzvü, Özbəkistan Yazıçılar Birliyinin fəxri üzvü, Əlişir Nəvai adına Özbəkistan Dövlət Universitetinin fəxri professoru, Türk Dünyası Beynəlxalq Elmlər Akademiyasının fəxri professoru və Vektor Beynəlxalq Elmlər Akademiyasının fəxri professorudur. II Türk Dünyası Beynəlxalq Ədəbiyyat festivalında “Türk Dünyası Onur medalı”, 2023-cü ildə Azərbaycan Yazıçılar Birliyinin “Humay Milli Mükafatı” və Türkiyə Elmlər Akademiyasının “Uluslararası Altın yıldız” medalı, Qırğızıstan Respublikasının “Çingiz Aytmatov” medalı, Qırğızıstan Təhsil Nazirliyinin “Altın qələm” mükafatı ilə təltif olunub. Onun 2021-ci ildə Azərbaycanda “Sənə məktub yazacam...” adlı ilk kitabı, 2023-cü ildə Türkiyənin Ankara şəhərində “Ay Laçın, can Laçın” adlı ikinci kitabı işıq üzü görüb. “Kimim var ki dağlarda” kitabı Bakıda, “Yarım qalan məktublar” kitabı qardaş Türkiyədə, “Özbəkistanım da Vətənimdir!” kitabı Özbəkistanda, “Salam olsun Qarabağdan Tanrıdağa!” kitabı qardaş Qırğızıstanda nəşrdədir.
Müzəffər Ali Baş Komandan İlham Əliyevin xalq üçün yaşanmış şərəfli ömür yolundan bəhs edən “Əsrin qəhrəmanı olan komandan” və “Əsrə bərabər 20 il” kitabları Xuraman Muradovanın Azərbaycan Prezidentinə böyük sevgisinin və vəfa borcunun ifadəsidir.
