Cəmiyyətdə mollalarla bağlı fikirlər birmənalı deyil. Vaxtaşarı bəzilərinin dini savadının olmaması, vətəndaşlara yüksək qiymətlərlə xidmət göstərmələri müzakirə edilir. Hətta xüsusilə bölgələrdə molların “yas biznesi” qurduqları iddia olunur. Əvvəllər 30-40 manata gələn mollaların indi heç 100 manata da razılaşmadığı deyilir. Necə deyərlər, dindən qazanc vasitəsi kimi istifadə edilir. Təklif olunur ki, onlar da lisenziya ilə fəaliyyət göstərsinlər və buna yerli icra oqranları nəzarət etsin.
Məsələ necə tənzimlənməlidir?
Dini Qurumlarla İş üzrə Dövlət Komitəsinin keçmiş sədri, dinşünas alim Rafiq Əliyev deyib ki, Qafqaz Müsəlmanları İdarəsi (QMİ) buna nəzarət etməlidir
“İcra hakimiyyəti və ya digər qurumların bu məsələyə müdaxilə etməsi doğru olmaz. Əslində qeyd etdiyim idarə Dini Qurumlarla İş üzrə Dövlət Komitəsinin iştirakı ilə mollaları attestasiyadan keçirir. Lakin yekun qərarı QMİ verir. Yəni məsuliyyəti onlar daşıyır. Attestasiyadan keçən mollaların sayı çoxdur. Kimsə kənardan molla dəvət edirsə, bu, ayrı məsələdir. Fikrimcə, səbəb qiymətlərlə bağlıdır. Məsələn, bəziləri qiymət aşağı olduğu üçün savadsız molla dəvət etməyə məcbur qalır. Amma mollalar Quran oxumaq və dua demək üçün pul almalı deyillər. Bu, haramdır”.
globalinfo.az
