Ötən gün Laçın rayon İcra Hakimiyyəti tender keçirib və onun nəticələrini açıqlayıb.
1xeber.media Tribunainfo.az-a istinadla xəbər verir ki, rəsmi qaynaqlarda bu tenderin Qayğı qəsəbəsində bir sıra işlərin reallaşdırılması məqsədi ilə keçiriliyi qeyd edilib.
Belə ki, Laçın İcra Hakimiyyəti Qayğı qəsəbəsində abadlıq işləri, qəsəbə daxili yolların cari təmirini, qəsəbə daxili işıqlandırmanı həyata keçirəcək. Bu işlərin ümumi dəyəri 696 min 170 manat təşkil edir ki, bununla əlaqədar “AVTOYOLTIKINTISERVIS” MMC ilə müqavilə imzalanıb.
Qeyd edək ki,sözügedən MMC-nin qanuni təmsilçisi Ramin Adil oğlu Məmmədovdur.
Bura qədər hər şey qaydasındadır.
Laçın İcra Hakimiyyəti tender keçirib, iştirakçı şirkətlərdən biri də prosesə qatılıb, sərəfli təklif verib və qalib olub. Amma udan şirkətin kimə məxsus olması məsələnin əksini deməyə də əsas yaradır.
Tribunainfo.az-ın əldə etdiyi bəzi məlumatlara görə, “Avtoyoltikintiservis” MMC-nin qanuni təmsilçisi Ramin Məmmədov Qobustanın icra başçısı Adil Məmmədovun oğludur. Həmin məlumatlara görə, Ramin Məmmədov məhz atasının nüfuzu və vəzifəsindən istifadə edərək, əksər iri tenderlərin qalibi ola bilir. Güman ki, Raminin atasının icra başçısı olması səbəbindən Laçının icra başçısı Aqil Nəzərli də ona bu tenderi “hədiyyə” edib.
Yazıda adı keçən şəxslərin də mövqeyini dərc etməyə hazırıq.
