Ötən gün Bakı Şəhər İcra Hakimiyyətinin başçısına yeni müavin təyin edilib. Ayaz Hüseynov Bakı şəhər İcra Hakimiyyətinin başçısının müavini vəzifəsinə gətirilib. O, təyinata qədər Bakı şəhər İcra Hakimiyyətində Şəhər təsərrüfatı şöbəsinin müdiri olub.
1xeber.media məlumatına görə, bu, son 4 ildə Bakı meriyasında ilk müavin təyinatıdır.
Qeyd edək ki, qanunvericiliyə görə Bakı Şəhər İcra Hakimiyyətinin 4 müavini olmalıdır. Onlardan biri birinci müavin vəzifəsini tutur. Bakı Şəhər İcra Hakimiyyəti başçısının müavinlərini Azərbaycan Respublikasının Prezidenti vəzifəyə təyin və vəzifədən azad edir.
İcra Hakimiyyətinin rəsmi saytında birinci müavin və müavinlər vəzifələrinin qarşısı uzun müddətdir adsız göstərilir.
Xatırladaq ki, meriyada birinci müavin postuna sonuncu təyinat 2018-ci ilin iyul ayında olmuş, bu vəzifəyə Eldar Əzizov gətirilmişdi. Lakin üç aydan sonra – 2018-ci ilin noyabrında Eldar Əzizov dövlət başçısının sərəncamı ilə Bakı Şəhər İcra Hakimiyyətinin başçısı vəzifəsinə irəli çəkildiyindən, birinci müavin postu boşalmışdı. O vaxtdan birinci müavin vəzifəsinə təyinat olmayıb.
Bakı Şəhər İcra Hakimiyyəti başçısının qadın müavini Fidumə Hüseynova 2021-ci ildə vəzifəsindən azad edilib. Onun yerinə də hələ ki təyinat yoxdur. İcra başçısının digər müavini Rauf Pənahov 2017-ci ildə vəfat edib və bu günə kimi onun yeri də boş qalıb.
Beləlikə, meriyada müavin postlarının artıq biri tutulub. Digər 3 müavin postuna da yeni təyinatların baş tutması gözlənilir.
