Bu gün Azərbaycan toylarının keçirildiyi şadlıq evlərinin menyüsündə toy edən şəxsə 10-15 adda yemək təklif olunur. Toy günü yeməklərin hamısı masaya qoyulsa da, qonaqların əksəriyyəti onların çoxundan dadmamış gedir. Toy sahibinin isə başı məclisə, qonaqlara qarışdığından evinə ac yollanır.
Şadlıq evlərinin hər birində isə Azərbaycan adət-ənənəsinə uyğun olaraq toy sahiblərinə evinə aparmaq üçün masaya qoyulan yeməklərdən kiçik bir pay qoyurlar. Halbuki toy sahibinin süfrədən qalan bütün yeməkləri evinə apara bilmək səlahiyyəti var.
Bəs, belə olan halda toylarda süfrədən qalan yeməkləri, içkiləri toy sahibinin evinə apara bilməməsinə nə mane olur? Bu sahədə boşluqlar nədir?
Azad İstehlakçılar Birliyinin sədri Eyyub Hüseynov Qaynarinfo-ya açıqlamasında bildirib ki, toy sahibinin məclisindən qalan bütün yeməkləri evinə aparmağa ixtiyarı var:
"Lakin şadlıq evi ilə müqavilə bağlamadığından ofisiantlar məclis başa çatmamış qalan bütün yeməkləri masalardan yığışdırırlar, heç nə qalmır. Toy sahibinin başı məclisinə qarışır, bir də axırda yadına düşür ki, skeleti qalıb. Verilən pula da kassa çeki verilmir. Bu sahədə də ciddi problem yaşanır. Nə qədər ki, toy sahibi ilə şadlıq evinin arasında müqavilə yoxdur, aldatmalar davam edəcək. Bu, istehlaçkıların hüquqlarının pozulması kimi qiymətləndirilə bilər”.
Eyyub Hüseynovun sözlərinə görə, bu məsələ ilə bağlı dəfələrlə ona müraciətlər edilib:
"Burada ciddi məsələ odur ki, toyxanalarda xidmət sahəsində tələb təklifi üstələyib, əhali toy etmək üçün növbəyə durub. Dəfələrlə demişəm, yenə də təkrarlayıram, bu gün nənələr, babalar nəvəsinin başını tumarlayanda "səni universitetdə oxuyan görəydim” deyil, "toyunu görəydim” deyirlər. Nə qədər insanların beyinlərində bu düşüncə var, bu, belə də davam edəcək”.
Sədr deyir ki, vəziyyətdən çıxmaq üçün alternativ yollar var:
"Müasir çadır toyları olmalıdır, ayaqyolusu, suyu ilə birlikdə. Şadlıq evlərinin bütün şəraiti həmin çadır evlərinə təklif oluna bilər. Tələb təklifi üstələyən kimi ortaya keyfiyyətsiz xidmət çıxır. Ona görə də Nazirlər Kabinetinin qərarı olmalıdır, toy edənlə xidmət göstərən arasında müqavilə imzalanmalıdır. Həmin müqavilədə şərtlər göstərilməlidir. Nə qədər ki, ortada belə bir sənəd yoxdur, heç kəs evinə yemək apara bilməyəcək”.
Eyyub Hüseynov hesab edir ki, əslində, şadlıq evlərində bütün xidmət ona hesablanıb ki, toya gələn qonaqlar şadlıq evlərindən tez rədd olub getsinlər:
"Həddən artıq musiqi səsləri, masaların dərhal yığışdırılması da ona hesablanıb. Bu sahədə böyük problemlər var. İqtisadiyyat Nazirliyinin tərkibində olan Antiinhisar və Bazara Nəzarət Dövlət Xidməti 3 ay öncə Prezidentin fərmanı ilə Prezident Administrasiyasına tabe olan quruma çevrildi. Prezident Yanında Antiinhisar və Bazara Nəzarət Dövlət Agentliyi oldu, Elnur Bağırov da ora rəis təyin edilib. Biz Elnur Bağırovdan bu kimi məsələlərin həllini gözləyirik”.
