Son illərdə boşanma hallarının artması, ailə münasibətlərində hüquqi tənzimləmələrə olan ehtiyacı daha da ön plana çıxarır.
Evlənərkən bir-birinə sonsuz etibar edən cütlüklər ayrılma mərhələsində alimentdən tutmuş, hədiyyələrə, hətta gündəlik məişət əşyalarına qədər hər bir detal üzrə mübahisə yaşayırlar. Halbuki nikahdan əvvəl bağlanacaq sadə bir müqavilə – nikah müqaviləsi – bu cür xoşagəlməz halların qarşısını ala, hər iki tərəfin hüquqlarını əvvəlcədən qoruma altına ala bilər.
Bir çox ölkədə geniş şəkildə tətbiq olunan bu hüquqi mexanizmə Azərbaycanda isə hələ də ehtiyatla yanaşılır və tərəflərin çoxu belə bir addımı atmaqdan çəkinir. Bəs nikah müqaviləsi bağlamağa nəyə görə laqeyd yanaşırıq və bu müqavilənin cəmiyyətimizdə normal qəbul olunması üçün hansı addımlar atılmalıdır?
Mövzu ilə bağlı Bizim.Media – ya danışan psixoloq Fərqanə Mehmanqızı bildirib ki, Azərbaycan şərq ölkəsi olduğu üçün insanlar daha çox hisslərə və emosiyalara üstünlük verirlər. Onlar üçün sənədlərin əhəmiyyəti yoxdur:
“Mediasiyada cütlüklərə bu barədə məlumat verirlər. Deyirlər ki, evlənərkən müqavilə bağlayın və şərtlərinizi orada açıq şəkildə bildirin. Bu, gələcəkdə tərəflərin öz hüquqlarını müdafiə etməsi baxımından düzgün mövqedir. Lakin insanlar evləndikdə "ayrılacam" düşüncəsi ilə ailə qurmaq istəmir. Ona görə də müqavilə kimi məsələlərlə ehtiyatlı davranırlar. Qarşı tərəfi, özünü incitməmək üçün nikah müqaviləsinə soyuqqanlı yanaşırlar. Bəzi məsələlər insanların xarakterinə, münasibətlərinə aiddir. Nikah müqaviləsini hamı imzalanmalıdır demək reallıqdan kənara çıxmaqdır. Bizim ölkədə bəzi insanlar cehiz, başlıqpulu kimi məsələlər barədə danışmağı ayıb hesab edir”.
Psixoloq qeyd edib ki, adət-ənənəmizdə əvvəllər nikah müqaviləsi bir qədər fərqli formada mövcud olub:
“Milli dəyərlərimizdə qadının hüquqları qorunur. Ancaq ailə dəyərlərimiz, mənəvi bağlılıqda nikah müqaviləsi, həm cəmiyyət, həm də tərəflər arasında doğru anlaşılmaya bilir. Bunun üçün zaman lazımdır. Bəlkə də maarifləndirmə işləri aparılsa, bizim üçün adiləşər. Bu da kifayət qədər vaxt tələb edən baxış bucağıdır",- deyə o fikrini yekunlaşdırıb.
