Reaktivlərin alınması ilə bağlı "Azəri Med" QSC ilə 113 min manatlıq müqavilə bağlanıb
Dövlət Tibbi-Sosial Ekspertiza və Reabilitasiya Agentliyi reaktivlərin satın alınması məqsədilə "Azəri Med" Qapalı Səhmdar Cəmiyyəti ilə 113 406,01 manat məbləğində müqavilə bağlayıb.
32gun.az-ın əldə etdiyi məlumata görə, şirkətin qanuni təmsilçisi Rəhimli Famil Vəli oğludur. Lakin mətbuatda yayımlanan və təkzib olunmayan məlumatlara əsasən, “Azəri Med”in əslində Milli Məclisin deputatı Kamaləddin Qafarova məxsus olduğu bildirilir.
Qeyd edək ki, “Azəri Med” xəstəxana, aptek və distribyutorları əczaçılıq məhsulları, tibbi cihazlar, sərf materialları və qida əlavələri ilə təmin edir. Şirkətə həmçinin “Zəfəran aptek”, “Kanon aptek”, “Zəfəran hospital”, “Tibbi market” və “Günəbaxan aptek” kimi brendlər də daxildir.
Xatırladaq ki, Dövlət Tibbi-Sosial Ekspertiza və Reabilitasiya Agentliyinin İdarə Heyətinin sədri Anar Bayramovdur.
