Çeçenistan rəhbəri Ramzan Kadırovun böyük qızı Ayşat Kadırova qardaşı, regionun Təhlükəsizlik Şurasının katibi, 17 yaşlı Adam Kadırovun yaxın günlərdə evlənəcəyini açıqlayıb.
1xeber.media Qaynarinfo-ya istinadla xəbər verir ki, bu barədə o, "Instagram" sosial şəbəkəsində abunəçisinin "kim evlənir?" sualına cavab verərkən bildirib.
"Qardaşım Adam evlənir", deyə Kadırova cavabında yazıb.
Onun sözlərinə görə, toy mərasimi Kadırovlar ailəsinin ata yurdu olan Axmat-Yurt kəndində, valideynlərinin evində keçiriləcək. Abunəçisinin "toydan bir parça göstərmək” xahişinə cavab olaraq Ayşat bildirib ki, toy günü telefonla məşğul olmağa vaxtı olmur.
Qeyd edək ki, 17 yaşlı Adam Kadırov 21 may tarixində son 10 gün ərzində ikinci dəfə mükafatlandırılıb. Çeçenistan Dövlət Televiziya və Radio Şirkəti "Qroznı”nın məlumatına əsasən, o, döyüş tapşırıqlarının yerinə yetirilməsində göstərdiyi köməyə görə "Axmat-Qala" dəstəsinin medalı ilə təltif olunub.
Mənbənin bildirdiyinə görə, təltifin səbəbi Adam Kadırovun Rusiya Qvardiyası bölmələrinin inkişafına verdiyi əhəmiyyətli töhfə olub. Mükafatı ona "Axmat-Qala” dəstəsinin rəhbəri, Çeçenistan rəhbərinin əmisi oğlu Abdul-Kərim Kadırov təqdim edib.
