Keçmiş xarici işlər naziri Tofiq Zülfüqarov AStar TV-yə müsahibəsində diplomatik ezamiyyətlərin az bilinən, real tərəflərindən danışıb. O, hazırda Prezidentin xüsusi nümayəndəsi olan Elçin Əmirbəyovla birgə keçirdikləri rəsmi səfərlərin nə qədər çətin şəraitdə baş tutduğunu açıqlayıb. Zülfüqarov bildirib ki, Moskvada ezamiyyə pulu gündə cəmi 3 dollar, İtaliyada isə 17 dollar olub. Sabiq nazirin sözlərinə görə, məbləğ az olduğu üçün ciddi qənaət etməyə məcbur olublar.
Sitat: “Elçin Əmirbəyovla o vaxtlar Vyanada səhər hoteldə yeyirdik, çalışırdıq çox yeyək ki, ‘obed’ə də bəs eləsin. Axşamlar danışıqlardan sonra gedirdik pizza və ya küçədə satılan hot-doq alırdıq. Evdən də konserv aparıb axşam oturub çörək yeyirdik”.
T.Zülfüqarovun bu açıqlaması ictimaiyyətdə maraq doğurub və müzakirələrə səbəb olub. Bəs ondan sonra XİN rəhbəri olmuş Elmar Məmmədyarovun dövründə vəziyyət necə idi?
Globalinfo.az-a danışan Elmar Məmmədyarov bildirib ki, o, ezamiyyət zamanı hər hansı ciddi çətinliklə qarşılaşmayıb:
“Mənim nazir olduğum dövrdə artıq hər şey baha idi. Ezamiyyətə gedən illərdə otellərin qiymətini artırdılar. Düzünü desəm, həm otel, həm də ezamiyyət pulu yaxşı verilirdi. Amma inanın ki, məbləğin nə qədər olduğunu xatırlamıram. Çünki ezamiyyət zamanı bütün xərcləri hökumət qarşılayırdı”.
