Gürcüstanda oktyabrın 4-də keçiriləcək yerli seçkilərlə əlaqədar yerli və beynəlxalq müşahidəçilərin qeydiyyatı başa çatıb.
1xeber.media xəbər verir ki, bu barədə Gürcüstan Mərkəzi Seçki Komissiyası (MSK) məlumat yayıb.
Bildirilir ki, MDK seçkiləri izləmək üçün 29 beynəlxalq təşkilatdan 80, 23 yerli təşkilatdan isə 7895 müşahidəçi qeydə alınıb.
Seçki günü Gürcüstanda 10-nu həbsxanalarında olmaqla, 3061 seçki məntəqəsi açılacaq.
2025-ci il seçkilərinin fərqli xüsusiyyəti ondan ibarətdir ki, İsveçrə və Macarıstan istisna olmaqla, demək olar ki, bütün Avropa səfirlikləri, 1990-cı illərdən bəri seçkiləri izləyən ABŞ səfirliyi də müşahidəçi kimi qeydiyyatdan keçməkdən imtina edib. Həmçinin ilk dəfə olaraq ATƏT/DTİHB, Beynəlxalq Respublikaçılar İnstitutu (İRİ), Milli Demokratiya İnstitutu (MDİ) və Avropa Parlamenti müşahidəçi göndərməyib.
Bütövlükdə beynəlxalq müşahidəçilərin əksəriyyəti qonşu və MDB-dən kənar ölkələrin seçki komissiyalarındandır.
Oktyabrın 4-də ölkənin 64 şəhər və rayonunda yerli seçkilər eyni vaxtda keçiriləcək. Seçilərdə 12 partiya iştirak edəcək.
