Xəbər verdiyimiz kimi, Səhiyyə Nazirliyinin “Respublika Narkoloji Mərkəzi” publik hüquqi şəxsinin sabiq baş direktoru Elşən Mustafayev və qurumun keçmiş direktor müavini Zamin Əliyevin cinayət işi üzrə məhkəmə prosesi yekunlaşıb. Bakı Ağır Cinayətlər Məhkəməsinin hökmü ilə hər iki şəxs 8 il müddətinə azadlıqdan məhrum edilib.
1xeber.media teleqraf-a istinadla xəbər verir ki, baş direktor və müavinin cinayət işinin bəzi təfərrüatları məlum olub.
Baş direktor və müavin Baş prokuror yanında Korrupsiyaya qarşı Mübarizə Baş İdarəsinin əməkdaşları tərəfindən saxlanılıblar. Onların iş otaqlarına əvvəlcədən yerləşdirilmiş gizli kamera vasitəsilə xəstəxanaya gələn pasiyentlərin yaxınlarından rüşvət almaları və həmin məbləğləri aralarında bölüşdürmələri qeydə alınıb.
İstintaqla müəyyən edilib ki, baş direktor və müavin mərkəzdə işləyən həkimlərin gələcəkdə fəaliyyətinə maneə yaradılmaması, pasiyentlərin stasionar müalicə müddətlərinin uzadılması, onların daha keyfiyyətli müalicə almaları üçün xəstə sayı az olan şöbələrə və ya tək nəfərlik palatalara yerləşdirilməsi, narkomaniya xəstəliyindən əziyyət çəkən şəxslərin xüsusi terapiya proqramına qəbul olunması və digər məqsədlərlə ayrı-ayrı vətəndaşlardan müxtəlif məbləğlərdə pul vəsaitini rüşvət qismində alıblar.
Təqsirləndirilən şəxslərə qarşı Cinayət Məcəlləsinin 308.2 (vəzifə səlahiyyətlərindən sui-istifadə, ağır nəticələrə səbəb olduqda), 311.3.1 və 311.3.2 (rüşvət alma, qabaqcadan əlbir olan bir qrup şəxs tərəfindən və təkrar törədildikdə) maddələri ilə ittiham irəli sürülüb.
İttihamda qeyd olunur ki, Elşən Mustafayev müavininin vasitəsilə Mərkəzin həkim-narkoloqlarından birindən işini davam etdirməsinə maneə yaradılmaması və yaş həddi ilə bağlı təqaüd məsələsinin qabardılmaması məqsədilə pul istəyib. Onun qarşısına xəstələrdən aldığı vəsaitdən rəhbərliyə çatdırılması tələbi qoyulub. Bu danışıqdan sonra həkim evə buraxılarkən hər xəstədən aldığı 5 manat və yaxınlarının minnətdarlıq əlaməti kimi verdiyi 100 manat “hörmət”in 50 manatını Zamin Əliyevə verib. Ümumilikdə 276 nəfər xəstədən hər birindən 5 manat alındığı müəyyən edilib.
Həmin həkim məhkəmədə şahid kimi ifadə verərək, baş həkim və müavinin göstərişi ilə xəstələrdən pul topladığını təsdiqləyib.
Baş həkim məhkəmədə dindirilən zaman bildirib ki, rəhbər təyin olunduğu vaxtdan xəstəxananın bir çox xərclərini şəxsi vəsaiti hesabına ödəyib. Onun sözlərinə görə, xəstəxanaya çatmayan dərmanların alınması, nasosların təmiri və digər texniki problemlərlə bağlı xərcləri özü qarşılayıb. Həmçinin Fövqəladə Hallar Nazirliyi tərəfindən xəstəxanaya yazılan cəriməni də şəxsi vəsaiti ilə ödədiyini qeyd edib. Mustafayev deyib ki, bu xərcləri qarşılamaq üçün qeyri-rəsmi fond yaradılıb.
İstintaq zamanı 23 nəfər xəstə yaxını baş həkimə və müavinə pul verdiklərini etiraf ediblər. Onlar bildiriblər ki, məqsədləri xəstələrinin daha yaxşı şəraitdə müalicə alması olub. Məhkəmədə şahid qismində dindirilən həmin şəxslər pulu baş həkim və müavinə könüllü verdiklərini, şikayət və tələblərinin olmadığını bildiriblər.
Araşdırma zamanı xəstə yaxınlarından birinin baş həkimə “şirinlik” kimi ləvəngi gətirdiyi də müəyyən edilib. Baş həkim bu epizodla bağlı açıqlama verməyib. İstintaq zamanı həkimə ləvəngi gətirdiyini şəxs məhkəmədəki ifadəsində bunu inkar edib.
Şahidlər ifadələrində qeyd ediblər ki, xəstələrini mərkəzə yerləşdirdikdən sonra onların səhhətində müsbət dəyişikliklər müşahidə ediblər. Buna görə də xəstəxanadan çıxarkən baş həkimə “şirinlik” verdiklərini bildiriblər.
Elşən Mustafayev və Zamin Əliyev yığılan pulların xəstəxananın yaranan xərclərinə yönəldildiyini deyərək özlərini qismən təqsirli biliblər.
Anket məlumatları dəqiqləşdirilərkən məlum olub ki, baş həkim Elşən Mustafayev mərkəzdəki vəzifəsi ilə yanaşı, “Ege Hospital”da da həkim-psixiatr kimi çalışıb. Hospital tərəfindən verilən xasiyyətnamədə Elşən Mustafayevin müsbət xarakterizə olunduğu qeyd edilib. O, həmçinin səhiyyə naziri tərəfindən “Səhiyyə Əlaçısı” döş nişanı ilə təltif edilib.
