“Azərbaycan bayrağının Türkiyə bayrağının yanında Türkiyə səmasında dalğalanmasını görmək millətimiz üçün böyük şərəfdir! Azərbaycanın sevinci sevincimiz, kədəri kədərimizdir”, - deyən Atatürkün fikirlərini son nəfəsinə qədər əməli fəaliyyəti ilə gerçəkləşdirmiş Ulu Öndər Heydər Əliyevin “Bir millət, iki dövlət” amalı tarixin və zamanın sınağından çıxmış bu birliyin, bütövlüyün rəmzinə çevrildi.
Azərbaycanın beynəlxalq aləmə inteqrasiyasında, regional təhlükəsizliyin qorunmasında və ümumiyyətlə, ölkəmizin siyasi-iqtisadi və elmi-mədəni maraqlarının reallaşmasında Türkiyə ilə hərtərəfli əməkdaşlığın genişlənməsinə xüsusi əhəmiyyət verən Heydər Əliyev bütün fəaliyyəti dövründə bu istiqamətdə kursun yüksələn xətt üzrə inkişafını təmin etdi.
1xeber.media xəbər verir ki, bu sözləri Əlişir Nəvai adına Özbəkistan Dövlət Universitetinin fəxri professoru Xuraman Muradova söyləyib. O deyib: “Dünyada bənzəri və müqayisəsi olmayan iki ölkənin bağlılığını özündə ehtiva edən “Biz bir millət, iki dövlət” fikirləri artıq həm Türkiyədə, həm də Azərbaycanda ölkələrimiz arasındakı münasibətlərin tarixini, bu gününü və perspektivlərini özündə ifadə edən ən mükəmməl formul kimi qəbul edilməkdədir.
Dostluq və qardaşlıq üzərində qurulmuş əlaqələrimiz Azərbaycan Respublikasının Prezidenti İlham Əliyevin və Türkiyə Respublikasının Prezidenti Rəcəb Tayyib Ərdoğanın birgə səyləri ilə strateji müttəfiqlik səviyyəsinə yüksəlib. Şuşa Bəyannaməsi bu birliyin mənəvi rəmzinə çevrilib.
Təqvimin 6 fevral tarixi doğma Türkiyəmizin, qan qardaşlarımızın taleyinə “Əsrin fəlakəti” adlanan zəlzələ dəhşəti ilə yazılıb. Hər bir Azərbaycan vətəndaşı körpəsindən böyüyünə qədər bu kədəri öz kədəri bildi. Biz də “VİP MİLAN Hospital” ailəsi olaraq qardaş ölkəyə əlimizdən gələn maddi-mənəvi dəstəyi göstərməyə çalışdıq”.
Xuraman Muradova Türkiyədə yaşanan “Əsrin fəlakəti”nin günahsız qurbanlarının əziz xatirəsinə həsr etdiyi şeirini oxuculara təqdim edib.
