Dövlət ittihamçısı Təranə Məmmədova sülh və insanlıq əleyhinə, müharibə və digər ağır cinayətlərdə təqsirləndirilən erməniəsilli şəxslərin məhkəməsində mühüm məqamları diqqətə çatdırıb. O qeyd edib ki, 2001-ci ilin əvvəllərindən 2021-ci il mayın sonlarınadək olan müddət ərzində “İsgəndər-M” əməliyyat-taktiki təyinatlı ballistik raketi, “Toçka-U” taktiki raket kompleksi, “9K33 OSA” özü yeriyən zenit raket kompleksi və digər texnikalar Rusiyadan gizli formada Ermənistana göndərilib. Ermənistanda həmin silahları işğal altında saxladığı Azərbaycan ərazilərində qanunsuz olaraq qurulmuş mühəndis-istehkam mövqelərinə yerləşdirməklə Azərbaycana qarşı təcavüzkar müharibədə istifadə edilib.
Azərbaycan Rusiyaya qarşı iddia qaldıra, beynəlxalq məhkəməyə müraciət edə bilərmi?
Hərbi ekspert Səxavət Məmməd deyib ki, 44 günlük müharibə zamanı, eləcə də ondan əvvəlki dövrdə Rusiyanın Ermənistana silah satması, hədiyyə etməsi ilə bağlı Azərbaycanın əlində ciddi informasiyalar var idi:
“Ermənistan və Azərbaycanın arsenalındakı silahların böyük hissəsi Rusiya istehsalı idi. Qaydalara uyğun olaraq bir ölkə başqa bir dövlətin istehsal etdiyi silahı müəyyən müqavilə imzalayıb, ödəniş etməklə alır. Buna görə heç kimi günahlandırmaq olmaz. Lakin Ermənistan tərəfindən Azərbaycana atılan raketlərin bir çoxunun erməni aresnalında olması ilə bağlı heç bir məlumat yox idi. Yəni görünür, proses qanunauyğun aparılmayıb. Şuşa, Gəncə, Bərdə, Mingəçevirə atılan raketlər də buna misal göstərilə bilər. İddialara görə, həmin raketlər Rusiyanın Ermənistandakı hərbi bazasına məxsusdur.
44 günlük müharibənin son günündə Xırdalan istiqamətində havada raket vurulduğuna dair xəbərlər də dərc olundu. Bunu hansı ölkənin – Rusiya, yoxsa Ermənistanın – atdığı məlum deyil. Azərbaycan məsələni gündəmə gətirməlidir”.
S.Məmmədin sözlərinə görə, müharibə zamanı ölkəmizə qarşı istifadə olunan texnikaların böyük qisminin göstəricisi 0 (sıfır) km idi:
“Hamısı Rusiya istehsalı idi. Azərbaycan Qarabağ məsələsi ilə bağlı həmişə Rusiyaya qarşı iddia qaldıra bilər. Rusiya böyük və aqressiv dövlətdir. Rəsmi Bakının beynəxalq məhkəməyə müraciət edəcəyi indiki məqamda gözlənilmir. Lakin Rusiya üzərinə düşən öhdəlikləri yerinə yetirməzsə, lazımi addımlar atılacaq”.
Globalinfo.az
